Foto: Kazakh Tourism
Álemdegi tanymal «Burning Man» festivalinde biregei qazaqstandyq Tengri Camp usynyldy. Jyl saiyn ótetin aýqymdy sharanyń geografiiasy keń jáne álemniń túkpir-túkpirinen ondaǵan myń kreatordy, sýretshi men zertteýshini toǵystyrady, dep habarlaidy Ult.kz.
Ashat Murat bastaǵan 20 astam qazaqstandyq entýziast shyǵarmashylyq bastama tanytyp, Blek-Rok shólinde «Tengri Camp» dep atalatyn qazaqstandyq kemp qurdy. Han ordasy úlgisindegi aýqymdy kiiz úi - onyń basty nyshany. Ol festival úshin arnaiy Qazaqstanda jobalandy jáne jasaldy.
Biiktigi 6 metr jáne diametri 10 metrdi quraityn kiiz úi ulttyq mádenietti, dástúr men tarihty pash etedi. Kiiz úidiń ishi ulttyq oiýlarmen bezendirilip, kiiz kilemdermen jáne turmystyq buiymdarmen jabdyqtalǵan. Onda sandyq, shapan, qamshy, torsyq jáne basqa da ulttyq qolóner týyndylary qoiylǵan. Festivalge ártúrli elderden kelgen qatysýshylar tek mádenietimizben tanysyp qana qoimai, qazaqtyń qonaqjailylyǵyn sezindi.
«Kiiz úidi jetkizýdi óz kúshimizben uiymdastyrdyq: aldymen avtokólikpen Qytaiǵa, odan ári temirjol arqyly Gýanchjoýǵa, keiin parommen Los-Andjeleske, al sońynda júk kóligimen shólge apardyq. Sońǵy 10 jylda alǵash ret bul jerde joiqyn daýyl bolyp, kórshiles lagerler men shatyrlardy ushyryp áketti. Bizdiń kiiz úi oǵan tótep berip, berik ekenin kórsetti. Onyń senimdi qurylymy talai ǵasyrlar buryn muqiiat oilastyrylǵan. Festival barysynda kóptegen adamdar kelip, ystyqtan bizdegi kiiz úide saia tapty. Sheteldik qonaqtar mádenietimizge úlken qyzyǵýshylyq tanytyp, ishindegi árbir buiym týraly surady. Biz olarǵa shapan jaýyp, dombyramen kúi tarttyq, ulttyq taǵamdardy usyndyq. 1 500-den astam adamǵa dastarhan jaidyq», - dedi «Traveler Group» kompaniialar tobynyń negizin qalaýshy Sabina Omar.
Qazaqstannyń Burning Man festivalinde usynylýy elimizdiń sheteldegi tanymaldyǵyn arttyryp, týristerdiń elimizben tanysýǵa qyzyǵýshylyǵyn arttyrady.
Atap ótken jón, Burning Man - álemdegi eń iri art-festivalderdiń biri. Ol jyl saiyn 70 000–80 000 qatysýshyny biriktiredi. Blek-Rok shólinde ýaqytsha qala qurylyp, onda ártúrli art-nysandar men instaliatsiialar jasalady.
