Foto: dknews.kz
Qazaqstan — iadrolyq otyn shyǵaratyn az elderdiń biri. Otyndy otandyq birinshi AES salýǵa qoldaný josparlanýda. Bul týraly «Qazaqstandyq atom elektr stansalary» AQ direktory Timýr Jantikin Qazaqstanda AES salý máseleleri boiynsha búgin Astanada ótip jatqan jariia talqylaý barysynda málimdedi.
"2018 jyly atom stansasyn salýdyń tehnikalyq-ekonomikalyq negizdemesiniń birinshi bólimin ázirledik, onda eki óńirde stansa salý múmkindikteri qarastyrylǵan. Atap aitqanda, bul óńirler - Kýrchatov, ShQO, qazir ol Abai oblysy, ekinshisi Ońtústik Qazaqstan oblysy, Balqash mańyndaǵy Úlken aýyly, bul Almaty oblysy. AEHA usynymdary boiynsha keń aýqymdy zertteý júrgizildi, atap aitqanda, qaýipsizdik, qýatty iadrolyq nysandardy ornalastyrý sharttary boiynsha jáne Qazaqstan Respýblikasynda qoldanylatyn normativter negizinde júrgizildi. Eki aýdan da jaramdy dep tanyldy", - dedi Timýr Jantikin.
Ol sonymen qatar Qazaqstannyń energiia júiesin boljaýǵa taldaý júrgizilgenin de aitty, sonyń negizinde ońtústik jaqta elektr energiiasy tapshylyǵy 2,7 gigavattqa deiin jetetini anyqtaldy.
"Ońtústik Qazaqstan – elektr energiiasye tutyný ortalyǵy. Ońtústik negizgi generatsiia bolyp sanalatyn Soltústikte shyǵarylatyn energiiany tutynady, iaǵni, bul iadrolyq kózdi ornalastyrýdyń ońtaily orny. 2019 jyly biz marketingtik protsedýralardy júrgizdik, jetekshi satýshylardan tehnikalyq jáne kommertsiialyq usynystar suradyq, bizge 13 joba usynysy berildi. Energetika ministrligimen birge kriteriiler júiesi ázirlendi, ol boiynsha biz Qazaqstanda qurylys úshin eń perspektivaly 4 jobany tańdadyq. Bul - Qytai, Koreia, Resei jáne Frantsýz kompaniialary. 2022 jyly osy tórt jobalyq usynys úshin derekterdi ózektendirý júrgizildi. Frantsýz Konsaltingtik kompaniiasymen birge baǵalaý kriteriileriniń júiesi jetildirildi. Qazirgi ýaqytta osy jobalyq usynystardy egjei - tegjeili zerdeleý jumystary júrgizilýde", - dedi Jantikin.
Onyń aitýynsha, marketing bóliminiń materialdary japondyq atom elektr kompaniiasy júrgizgen halyqaralyq saraptamadan ótken.
"Ol bizdiń barlyq nátijelerimizdi, zertteý ádistemelerimizdi rastady jáne bizdiń usynysymyzben kelisti. Birinshi stantsiia Balqashtaǵy Úlken aýylynyń aýdanynda salynýy kerek. AES qurylysy kezinde 8000 jumys orny jáne paidalanýǵa berilgennen keiin 2000 jumys orny qurylady", - dep atap ótti Jantikin.
