Qazaqstannyń Tuńǵysh Prezidenti Nursultan Nazarbaev elde atom elektr stantsiiasy salynatynyn aitty, dep habarlaidy Sputnik.
"Qazaqstan atom elektr stantsiiasyn salatyn bolady. Ol úshin merdiger men tehnologiiany tańdaý qajet. Qazir Resei, Japoniia, Ońtústik Koreia men amerikalyq kompaniia qurylys júrgizýge niet bildirip otyr. Ony qai jerde salýǵa bolatynyn qarastyryp jatyrmyz", - dedi Nazarbaev Oliver Stoýnnyń "Qazaq: history of the golden man" derekti filmine bergen suhbatynda.
Elbasy atom elektr stantsiiasy Qazaqstanǵa energiia tapshylyǵy máselesin sheshý úshin qajet ekenin atap ótti.
"Qazirgi kúni bizde elektr energiiasynda tapshylyq joq. Kerisinshe artyq. Munai, gaz ben kómir óndiretin elmiz. Alaida atom elektr stantsiiasynyń qurylysy 7-8 jyl júrgiziletindikten, ol kezge deiin tapshylyq týyndaýy múmkin", - dedi ol.
Nazarbaev sonymen qatar AES qurylysyn Resei júrgizgisi keletinin jáne Qazaqstannyń basqa elmen kelisim jasap jatpaǵanyn jii suraitynyn atap ótti.
"Bul jóninde arnaiy komissiia bar. Sol komissiia stantsiiany qai jerde jáne qashan salynatynyn sheshedi. Qazir bul nómir birinshi másele emes. Degenmen biz AES salatyn bolamyz", - dedi ol.
Qazaqstan Prezidenti Qasym-Jomart Toqaev ta elde AES salý qajettiligi týraly birneshe ret aitqan bolatyn.
"Óz basym bul máseleni naqty qarastyratyn kez keldi dep sanaimyn. Óitkeni Qazaqstanǵa atom stansasy qajet", - dedi Toqaev Vladivostokta ótken Shyǵys ekonomikalyq forýmynda.
Prezident óz Joldaýynda Qazaqstanda atom energetikasyn qurý múmkindigin jan-jaqty zertteýdi tapsyrǵanyn eske saldy.
