Qazaqstan 2020 jyly 1,3 mlrd dollardyń aýyl sharýashylyǵy ónimderin eksportqa shyǵardy. Bul týraly Ortalyq kommýnikatsiialar qyzmetindegi baspasóz máslihatynda QR Aýyl sharýashylyǵy ministri Saparhan Omarov aitty, dep habarlaidy "Ult aqparat".
«Jalpy, ótken jyl jaqsy nátijelermen aiaqtaldy. 20,1 mln tonna dándi jáne dándi-burshaqty daqyldar bastyryldy. Litsenziialanǵan astyq qabyldaý kásiporyndaryna tapsyrylǵan jalpy bidai kóleminiń 80 paiyzy 1-3-synyptarǵa jatqyzyldy. 2019 jyly bul kórsetkish 50 paiyzdy quraǵan bolatyn. Tiisinshe, 4-synypty bidaidyń úlesi 2019 jylǵy 27,7 paiyzdan 13,4 paiyzǵa, al 5-synypty bidaidyń úlesi 10,7 paiyzdan 5 paiyzǵa tómendedi», - dedi ministr.
Onyń atap ótýinshe, 2020 jyldyń qorytyndysy boiynsha iri qara mal 7,8 mln basty qurady. Bul 2019 jyldyń deńgeiinen 5,6 paiyzǵa kóp. Qoi men eshki basy 4,7, jylqy 10,1, túie 5,2 paiyzǵa artty. Tiisinshe mal sharýashylyǵy ónimderi – et 4,3, sút 3,2 paiyzǵa ulǵaiýda.
«Nátijesinde jalpy aýyl sharýashylyǵy óniminiń kólemi 2020 jyly 5,7 paiyzǵa artyp, 6,3 trln teńgeni qurady. Bul - Eýraziialyq ekonomikalyq odaq elderi arasyndaǵy eń úlken ósim. Tamaq ónimderiniń óndirisi 4 paiyzǵa ósti. Aýyl sharýashylyǵynyń negizgi kapitalyna tartylǵan investitsiialar aǵyny 15, tamaq ónimderi óndirisine tartylǵan investitsiialar aǵyny 13,5 paiyzǵa artty. Qorytyndysynda agroónerkásip keshenindegi investitsiialardyń jalpy kólemi 677,2 mlrd teńgeni qurady. Bul josparly mánnen 154,2 mlrd teńgege asyp otyr», - dedi Saparhan Omarov.
Ministrdiń dereginshe, óńdelgen aýyl sharýashylyǵy ónimderiniń eksporty 22 paiyzǵa artyp, 1,3 mlrd AQSh dollaryn qurady.
«Agroónerkásip keshenin odan ári ornyqty damytý maqsatynda ministrlik Agroónerkásip keshenin damytý jónindegi 2021-2030 jyldarǵa arnalǵan tujyrymdamany jáne Agroónerkásip keshenin damytýdyń 2021-2025 jyldarǵa arnalǵan ulttyq jobasyn ázirledi. Memleket basshysynyń tapsyrmalaryna sáikes olardyń negizgi maqsattary: birinshi, eńbek ónimdiligin 2,5 esege arttyrý; ekinshi, ishki naryqty azyq-túlik taýarlarymen 80 paiyz deńgeiinde molyqtyrý; úshinshi, óńdelgen ónim eksportyn 2 esege ulǵaitý; tórtinshi, iri investitsiialyq jobalar ainalasynda 7 ekojúie qalyptastyrý. Jalpy, josparlanǵan is-sharalar aldaǵy bes jylda eńbek ónimdiligin 2,5 esege arttyrýǵa, óńdelgen ónim eksportyn 2 esege ulǵaitýǵa, sondai-aq salaǵa 4,5 trln teńge investitsiia tartýǵa múmkindik beredi. Bul qosymsha 500 myń adamdy jumyspen qamtamasyz etip, 1 mln adamnyń tabysyn arttyrady», - dedi ol.
