Qazaqstan quramasy 2018 jylǵy Olimpiada oiyndaryna qatysady. Bul týraly mádeniet jáne sport ministri Arystanbek Muhamediuly málimdedi, - dep habarlaidy "Ult aqparat" Tengrinews.kz portalyna silteme jasap.
"Búgin Vladimir Pýtin halyq aldynda sóz sóilep, ynta bildirgen reseilik sportshylardyń qatysatynyn málimdedi. Men onymen kelisemin. Ol sportshylar qai tý astynda shyǵatyny mańyzdy emes, munda esh ereje buzýshylyq joq dep anyq aitty. Ol - sportshylardy jaqtaýshy, al men onyń pikirine qosylamyn", - deidi Muhamediuly.
Ministr qazaqstandyq sportshylardyń 2018 jylǵy Olimpiadada jetistikterge qol jetkizý úshin belsendi túrde daiyndalyp jatqanyn aitady.
"Biz jaqynda Parlamentke dopingke qarsy qyzmet boiynsha zań jobasyn usynamyz. Dopingke teris kózqarastamyz, árine. Osy zań qabyldanǵannan keiin Qazaqstanda bul másele tóńireginde áńgime bolmaidy degen oidamyn", - dep atap ótti ol.
Ministr reseilik depýtattyń 2018 jylǵy Olimpiada oiyndaryna qatyspaýǵa shaqyrýyna qatysty da óz oiyn aitty.
"Bul kózqaras. Bárinde bar. Árbir tulǵanyń aitqanyna qarai bersek, durys bolmaidy. Memleket ustanymy bar. Qazir bizde 17 joldama bar, bul qýantady. Bizdiń qazirgi maqsat - kóbirek joldama alyp, Olimpiadada jaqsy nátije kórsetý", - dedi Muhamediuly.
Eske salaiyq, Resei Memlekettik dýmasynyń depýtaty Vitalii Milonov BRIKS elderiniń - Belarýs, Qazaqstan men Qyrǵyzstannyń Ulttyq Olimpiada komitetterine Resei shettetilgen jaǵdaida niettestik retinde 2018 jylǵy Olimpiada oiyndaryna qatyspaýǵa shaqyǵan bolatyn.
Ońtústik Koreianyń Phenchhan qalasynda ótetin 2018 jylǵy Olimpiada oiyndary aqpannyń 9-y men 25-i aralyǵy ótedi.
