Elimizdegi zańsyz kóshi-qonǵa qarsy kúres máselesi búgin Senatta qaraldy, dep habarlaidy QazAqparat.
«Biz búginde 14 elmen zańsyz kóshi-qonǵa qarsy kúres jónindegi birlesken kelisimdi ázirledik. Qazirgi ýaqytta onyń beseýine qol qoiyldy. Olardyń qatarynda Qyrǵyzstan, Ózbekstan, Ázerbaijan, Belarýs eli bar. Jáne segizi bizdiń kontragentterdiń qaraýynda. Atalǵan elderdiń ishinde kórshilerimiz Resei men Qytai da bar. Odan bólek, biyl Armeniiamen de kóshi-qon boiynsha kelisimge kelmekpiz. Búginde atalǵan elder tiisti rásimderin ótkizip jatyr», - dedi QR Ishki ister ministriniń birinshi orynbasary Marat Qojaev.
Vitse-ministrdiń málimdeýinshe, atalǵan kelisimder zańsyz kóshi-qonnyń aldyn alýmen qatar syrttan keletin jumys kúshi kólemin anyqtaýǵa yqpalyn tigizedi.
«Kórshi eldermen qarym-qatynasty zańdastyrǵanymyz jón, ásirese eki alyp kórshimiz Qytai jáne Resei elimen. Bul elderden kelip jatqan eńbek migranttarynyń jaǵdaiy bárimizge belgili. Sondyqtan bul ministrliktiń basty nazarynda bolatyn máselelerdiń biri dep esepteimin», - dedi QR Parlamenti Senatynyń depýtaty Muhtar Qul-Muhammed.
Aita ketsek, búgin Senattyń Halyqaralyq qatynastar, qorǵanys jáne qaýipsizdik komitetiniń keńeitilgen otyrysynda «Qazaqstan Respýblikasy Úkimeti men Ózbekstan Respýblikasy Úkimeti arasynda zańsyz kóshi-qonǵa qarsy kúreste yntymaqtasý jónindegi kelisimdi ratifikatsiialaý týraly» zań jobasy qaraldy.
