L.N. Gýmilev atyndaǵy EUÝ Jasandy intellekt ǴZI ǵalymdary ChatGPT chat-botynyń qazaq tilindegi otandyq analogin ázirlep shyǵardy. Endigi jerde qazaqstandyqtar jańa júieniń kómegimen qajetti aqparatty naqtylai alady, dep habarlaidy "Ult aqparat".
ChatGPT – amerikalyq kommertsiialyq emes OpenAl kompaniiasynyń neirondyq jelisi. Ol arqyly jasandy intellektpen hat almasýǵa múmkindik bar. Kez kelgen suraq qoiyp, tapsyrma da bere alasyz. Sáikesinshe, sońǵy ýaqytta bul jelige turǵyndardyń suranysy arta bastady.
Qazaq tilindegi nusqanyń shyǵýy ýaqyt enshisindegi másele edi. Muny L.N. Gýmilev atyndaǵy EUÝ «Jasandy intellekt» ǵylymi-zertteý institýtynyń qyzmetkerleri nebary 5 aidyń ishinde sátti júzege asyra bildi.
"Biz qazaq tilinde tuńǵysh iri LLM til úlgisin jasadyq. Júie neirondyq jeli negizinde qazaq tilindegi kez kelgen mátindi túsinýge jáne óz bilimine sáikes jaýap berýge qabiletti. Bizdiń ChatGPT prototipimiz qazaq tiliniń erejelerin túsinedi, áripter men býyndar, sózder men sóilemder arasyndaǵy barlyq tizbekterdi este saqtaidy. Iaǵni, qazaq tiliniń barlyq morfologiialyq jáne sintaksistik erejelerin meńgergen", – deidi L.N.Gýmilev atyndaǵy EUÝ «Jasandy intellekt» ǵylymi-zertteý institýtynyń direktory Álibek Barlybaev.
Jańa júie, ásirese, oqýshylar men stýdentter arasynda zor suranysqa ie bolady dep kútilýde.
"Mektep oqýshylary emtihanǵa daiyndalý kezinde testtegi keibir aqparatty, máselen, matematika teńdeýi nemese himiiadaǵy termindi túsinbedi delik. Ózderi naqtylaǵysy keledi, biraq olardyń qasynda muǵalim bolmaidy. Sondai kezde balalar júiege suraq qoiyp, óte tez jáne qysqa jaýap alady. Bul tehnologiiany jalpy bilim beretin kýrstardy jii oqityn bastapqy kýrstardyń stýdentteri úshin de paidalanýǵa bolady", – deidi Á. Barlybaev.
Ǵalymdar jańa jasandy intellekt júiesine patent alyp úlgergen. Ázirge qazaqstandyqtar chat-bottyń kómegine júgine almaidy. Júie tolyqqandy qyzmet kórsetý úshin shetelden sýperkompiýterler satyp alynbaq.
"Bul júieni qazaqstandyqtar arasynda qalai tanymal qylamyz?" degen saýalǵa jaýap izdedik. Aqyry eGov portalyna ornalastyrý tiimdi bolatynyna kóz jetkizdik. Sol baǵytta jumys istep jatyrmyz. Jyl sońyna deiin iske qosamyz degen josparymyz bar. Júie portal qoldanýshylaryna qajetti aqparattardy jedel saraptap, qujattaryn retteýge múmkindik beredi", – deidi Á. Barlybaev.
Qazaq tilindegi jańa jasandy intellekt júiesin ǵalymdar - Álibek Barlybaev pen Ásel Muqanova ázirlegenin atap ótken jón. Búginde jobanyń tehnikalyq jáne serverlik múmkindikterin nyǵaitý jumystary jalǵasýda.
