Foto: «Qazaq tili» qoǵamy
28 qarasha kúni Astanada Halyqaralyq «Qazaq tili» qoǵamynyń uiymdastyrýymen Disney stýdiiasynyń «Moana 2» animatsiialyq filminiń qazaq tilindegi tusaýkeser kórsetilimi ótti. Kórsetilimge elimizge tanymal tulǵalar, qoǵam qairatkerleri, kásipkerler men depýtattar, dýbliaj akterlary men blogerler, BAQ ókilderi qatysty.
Filmderdi túrli elderge beiimdep, dýbliajdaý – Disney kompaniiasynda burynnan qalyptasqan úrdis. Disney jyl saiyn ár filmniń túrli tilderdegi 40-ǵa jýyq nusqasyn daiyndaidy. «Qazaq tili» qoǵamynyń uiytqy bolýymen biyldan bastap iri halyqaralyq stýdiialar álemdik premeralaryn qazaq tilinde usyna bastady. Osy bastama aiasynda Disney stýdiiasy biyl «Oijumbaq 2», «Moana 2», «Mýfasa. Arystan patsha» dep atalatyn úsh filmin qazaq tiline aýdaryp, dýbliaj jumystaryn qarjylandyrdy.
Film keiipkerlerin qazaq tilinde sóiletkender: qazaqstandyq ánshi Nazima, ol Moananyń barlyq ánin oryndaidy. Moana Quralai Ótepovanyń daýysymen sóileidi. Aktrisa Ainur Bolat – Moana men Maýige qater tóndiretin Matangidi dybystady, al Matangidiń ánderin Gaýhar Ómirzaqova oryndady. Qobylandy Bolat alpamsadai jartylai qudai Maýidi dybystady. Baqytjan Álpeiis – «kúńkildek baǵban» jáne Moananyń tobynyń múshesi Keleni «sóiletti». Qazaq tilindegi dýbliaj rejisseri – Shah-Murat Ordabaev. Mýzykalyq jetekshi – Anel Sirgebaeva.
Film rejisseri – kishi Deiv Derrik, mýzyka avtory – «Gremmi» syilyǵynyń júldegerleri Ebigeil Barloý men Emili Bear, «Gremmi» nominanty Opetaiia Foaia men úsh dúrkin «Gremmi» júldesiniń iegeri Mark Manchina.
«Qazaq tiline aýdarylyp jatqan filmderdi keńinen nasihattap, kinoteatrlarǵa baryp, qazaq dýbliajyn qoldaýǵa shaqyramyz. Álemdik stýdiialardyń qazaqtildi ortanyń qyzyǵýshylyǵyn eskerip, týyndylaryn óz esebinen aýdaryp, usynýy – biz úshin óte jaqsy jańalyq. Biylǵy álemdik premeralardyń qazaq tilindegi aýdarmasy buryn sońdy bolmaǵan rekordtyq kórsetkishterge jetti. Qazaqsha kino qaraýǵa yqylasty qaýymnyń kóbeigeni anyq baiqaldy. Aldaǵy ýaqytta tanymal týyndylardy qazaq tiline aýdarý dástúri jalǵasa beredi. Bul tilimizdiń, ásirese, balalar men jastar úshin tartymdylyǵyn arttyrýǵa jáne keńinen taratýǵa baǵyttalǵan tiimdi tásil dep sanaimyn», – deidi Halyqaralyq «Qazaq tili» qoǵamynyń prezidenti Raýan Kenjehanuly.
Buǵan deiin Disney men Pixar stýdiiasy «Oijumbaq 2» filmin qazaq tiline aýdaryp, kásibi dýbliaj jasady.
«Oijumbaq 2» filmi alǵashqy 4 kúnde 40 000 000 teńgeden asa qarajat jinap, buǵan deiin kórsetilgen týyndylar arasynda rekord ornatty. Qyrǵyzstan, Armeniia, Grýziia, Ázerbaijan, Ózbekstan, Tájikstan elderi arasynda Qazaqstan jinalǵan soma boiynsha birinshi orynda turdy.
