Mańǵystaýda jol qozǵalysy erejesin buzǵan kólik júrgizýshisi jol saqshysyna – «Keliseiik, kómektesip jiber, qazaqpyz ǵoi» dep, 2000 teńge bergeni úshin basy bálege qalyp, 336 700 teńge kóleminde aiyppul tóleitin boldy.
Oqiǵa 20 maýsymda «Aqtaý – Jetibai» tas jolynyń 16 shaqyrymynda bolǵan. GAZel avtokóligin tizgindegen K.Tóleshov úziksiz jolaqty kesip ótkeni úshin Mańǵystaý oblystyq ishki ister departamenti jergilikti politsiia qyzmetiniń jol-patrýldik politsiia qyzmetkeri T.Orazulymen toqtatylǵan.
Jaýapkershilikten jaltarǵysy kelgen kólik júrgizýshi jol saqshysyna 2000 teńge zańsyz materialdyq syiaqy usynǵany belgili bolǵan. Atalmysh is ishki ister departamentiniń ózindik qaýipsizdik basqarmasymen QR Memlekettik qyzmet isteri jáne sybailas jemqorlyqqa qarsy is-qimyl agenttiginiń Mańǵystaý oblysy boiynsha departamentine joldanǵan. Munan soń sybailas jemqorlyq profilaktikasy basqarmasynyń bas mamany E.Sisenaliev kólik júrgizýshisiniń ústinen QR ákimshilik quqyq buzýshylyq týraly Kodeksiniń 676 babymen ákimshilik is qozǵap, sotqa joldaǵan.
Munaily aýdandyq ákimshilik sotynda qaralǵan material boiynsha, jaýapkershilikke tartylǵan kólik júrgizýshisi óz kinásin tolyqtai moiyndap, shynaiy ókingenin jáne óziniń jumyssyz ekendigin, asyraýynda kámelettik jasqa tolmaǵan úsh balasynyń baryn, densaýlyǵynyń syr bergenin alǵa tartyp qatań jaza qoldanbaýyn ótingen.
Sýdia barlyq mán-jaidy eskerip, 200 ailyq eseptik kórsetkish mólsherinde jaza qoldanýdy jón dep tapqan. 819 baptyń 2-shi bóligin nazarǵa alyp, salynatyn 481 000 teńge kólemindegi ákimshilik aiyppul mólsherin 30 % tómendetip, nátijesinde 336 700 teńge kóleminde ákimshilik aiyppul salǵan.
QR Memlekettik qyzmet isteri jáne sybailas jemqorlyqqa qarsy is-qimyl agenttiginiń Mańǵystaý oblysy boiynsha departamentiniń basshysy, Ádep jónindegi keńes tóraiymy Nurgúl Jannazarovanyń aitýynsha, elimizde sońǵy kezderi ákimshilik jaza qoldaný kezinde osyndai iri kólemde aiyppul salý praktikasy jii engizilip júr.
«Kez-kelgen júrgizýshi nemese memlekettik organ qyzmetkeri osydan nátije shyǵarsa igi. Zań aldynda barlyǵynyń quqyqtary men mindetteri birdei. Barlyǵy da tanys-tamyr arqyly nemese syiaqy berip jaýapkershilikten qutylyp ketemin degen oidan arylýy qajet. Talapty oryndap tártipti saqtamasańyz, moiynyńyzǵa júz myńdaǵan aiyppul arqalaýmen júresiz. Tańdaý qashanda adamnyń óz erkinde», - deidi ol.
Aita ketý kerek, jeke tulǵamen zańsyz materialdyq syiaqy berý faktisi avtokólik joldarynda sybailas jemqorlyq kórinisterin azaitý jónindegi 10 qadam jospary boiynsha qoǵam ókilderiniń qatysýymen reidtik is-sharalar júrgizý barysynda anyqtalyp otyr.
Al zańsyz syiaqydan bas tartqan jol inspektorynyń zańdy áreketi, onyń áriptesterine úlgi bolary anyq. Bul rette agenttiktiń aýmaqtyq departamenti ishki ister organdarynyń basshylyǵyna politsiia qyzmetkeri T.Orazulyna alǵys jariialaý týraly usynys bermek.
