31 tamyz kúni tańǵy saǵat 4-te «Arselor Mittal Temirtaý» aktsionerlik qoǵamyna qarasty «Kazahstanskaia» shahtasynda metan gazy taraýyna bailanysty bolǵan qaiǵyly oqiǵadan keiin alty kishkentai náreste men áli dúniege kelmegen bir ishtegi bala ákesiz qaldy, dep habarlaidy QazAqparat.
«Rústem Ahmetjanovtyń jasy 34-te bolǵan, úsh balanyń ákesi. Valerii Rýdenko 37 jasta, eki balasy jetim qaldy. Maksim Shebanov - 31-de, bir balasy bar», - dep habarlady «ArselorMittal Temirtaý» kompaniiasynyń baspasóz qyzmeti.
Maksim Shebanovtyń áieli ekinshi balasyna júkti. Qaza tapqan kenshilerdiń týysqandary úshin bul orny tolmas qaza boldy, barlyǵy qandai da bir málimdeme berýden bas tartty. Valerii Rýdenkonyń kórshisiniń aitýynsha, kenshi eki balasymen qatar, qos jienin de materialdyq turǵydan qamtamasyz etip otyrǵan.
«Bizdiń qalamyzda árbir eki otbasynyń biri - kenshi. Áýlet bolyp kómir óndirisine jumys isteidi. Sol sebepti úsh adamnyń qazasy - jeke otbasynyń ǵana emes, tutas Shahtinsk qalasyna ortaq qaiǵy. Qaitys bolǵandardyń ekeýi - Novodolinka aýylynan», - dedi Alla Gavrilova.
Aita keteiik, 31 tamyz kúni tańǵy saǵat tórtten asa AGQ (avtomattandyrylǵan gaz qorǵanysy) operatory taý dispetcherine 332 D6-1-3 jeldetkish túiisiminde metan kenjardy baqylaý tetiginen bailanys joǵalǵany týraly jáne shahtanyń batys jeldetkish uńǵysynda metan deńgeiiniń kóterilgenin habarlaǵan. Shahta basshylyǵy tez arada jaǵdaidy anyqtaý sharalaryn júrgizgen: kenjarǵa Kásibi áskerilendirilgen apattyq qutqarý qyzmetiniń eki bólimshesi men sol ýchaskeniń taý sheberin jibergen. Tańǵy saǵat 6-da úńgýshiler osy kenjardan óli kúiinde tabyldy. Aldyn ala derek boiynsha qaiǵyly jaǵdai kenetten metannyń (gaz dinamikalyq qubylys) taralýy saldarynan bolǵan. Oqiǵa kezinde shahtada 132 adam bolǵan, onyń 129-y apatty joiý josparyna sáikes ózderi jerdiń betine shyqqan.
Kásibi áskerilendirilgen apattyq qutqarý qyzmetiniń 49 qyzmetkeri men 9 tehnika apatty joiý jumystaryn júrgizýge tartyldy. Shahtadaǵy jumys ýaqytsha toqtatyldy. Oqiǵanyń mán-jaiyn anyqtaý úshin arnaiy memlekettik komissiia quryldy, tergeý júrip jatyr. Tergeý nátijesi komissiia jumysy aiaqtalǵannan keiin belgili bolady.
