Foto: Qazaqstan.tv
Jýyrda Eýropadaǵy halyqaralyq kinofestivalde júldeli oryndar alǵan "Ábil" filminiń rejisseri Elzat Eskendirdi "Qazaqfilm" kinostýdiiasy ǵimaratyna kirgizbei qoiǵan. Bul týraly ónertanýshy Erlan Tóleýtai áleýmettik jelidegi paraqshasynda jazdy, dep habarlaidy Ult.kz.
"Rýhani asharshylyqqa ushyratý saiasaty"
Erlan Tóleýtai stýdiia basshylyǵy ónerpazdardy jeńispen quttyqtaidy dep kútken, alaida eshkim habarlaspaǵan. Sol sebepti olar «Qazaqfilmge» ózderi barýǵa sheshim qabyldaǵan, alaida kúzet ishke kirgizýden bas tartqan.
"Shyntýaitynda biz «Qazaqfilmge» erigip barmaǵan edik. Eýropadan soń «Qazaqfilm» basshylyǵynan habar kútkeli aptanyń júzi bolǵan-dy. Alaida A.Omarov bizdei halyqaralyq kinofestival jeńimpazdaryn quttyqtamaq túgili habarlasýdy boiyna ar sanady bilem – habarlaspady", – dep jazdy Tóleýtai.
Sondai-aq, ol stýdiiada «Qazaqanimatsiia» shyǵarmashylyq birlestigin Astanaǵa kóshirý máselesi qarastyrylyp jatqanyn aitty. Onyń pikirinshe, bul sheshimniń artynda kinostýdiia jerin satý múddesi tur, sebebi «Qazaqanimatsiia» ujymy buǵan qarsy bolyp kelgen.
"Munyń artynda qazaq sábilerin rýhani asharshylyqqa ushyratý saiasaty jatyr", – dep senedi ol.
Erlan Tóleýtai mádeniet qairatkerleri men qoǵamdy kinogerlerge qoldaý kórsetýge jáne ulttyq animatsiiany saqtap qalýǵa shaqyrdy.
Jariialanǵan beinejazbada Tóleýtai men Elzat Eskendirdiń kinostýdiia qaqpasynyń aldynda turyp, ishke kire almai turǵan sáti kórsetilgen. Telefon arqyly sóileskende, bireý kúzetke olardy kirgizbeýdi tapsyrǵanyn aitqan.
Aita keteiik, «Ábil» filmi Frantsiiadaǵy halyqaralyq kinofestivalde úsh mártebeli marapatqa ie bolǵan edi.
Kim kináli?
Keiin «Sh.Aimanov atyndaǵy «Qazaqfilm» Ulttyq kinostýdiia» AQ Erlan Tóleýtaidyń jazbasyna qatysty túsinikteme berdi. Ujymnyń pikirinshe, film avtorlary tym erte qamdanyp qoiǵan. Sál kútse, quttyqtaý da jetetin edi.
"Kinojobalardyń avtorlaryn quttyqtaý boiynsha júieli jumys bar – bul áleýmettik jelilerde mindetti quttyqtaýlar. Jáne kinostýdiia ujymy mindetti túrde birneshe festivalderdiń qorytyndysy boiynsha filmdi aidyń sońynda quttyqtaidy", - delingen habarlamada.
Al film avtorlarynyń issaparyna qarjy bólinbegeni - merdiger kompaniianyń óz mindetterin oryndamaǵanynan boldy dep otyr.
"Bul film boiynsha seriktesimiz «Tanaris» JShS kinokompaniiasy filmniń kommertsiialyq satylymynan paida tabý maqsatynda filmdi halyqaralyq kinonaryqtar men kinofestivalderde ilgeriletý boiynsha qarjylyq mindettemelerdi moinyna alǵan. Osyǵan orai, kinostýdiia kelisim sharttaryna sáikes shyǵarmashylyq toptyń saparyn qarjylandyrý úshin «Tanaris» JShS kinokompaniiasyna habarlasqan, alaida búgingi kúnge deiin «Tanaris» JShS kinokompaniiasynan jaýap kelgen joq", - deidi kinostýdiia.
Al nelikten ǵimaratqa kirgizbegeni týraly suraqqa "Qazaqfilm" avtorlarmen buǵan deiin kezdeskenin jetkizdi.
"Jer satylatyny týraly aqparat jalǵan"
Kinostýdiia "ǵimarattyń jerin satpaq" degen aqparat jalǵan deidi. Sonymen qatar, mundai áreketter stýdiianyń damý múddelerine qaishy keletinin jáne qazirgi basqarý saiasaty aiasynda josparlanbaǵanyn jetkizdi.
"2025 jyldyń 25 aqpanynda «Sh.Aimanov atyndaǵy «Qazaqfilm» Ulttyq kinostýdiiasy» AQ ǵimaratynyń aldynda (Almaty, Ál-Farabi dańǵyly, 176) ótken ruqsat etilmegen mitingige qatysty aitatynymyz: mitingke jinalǵandar Qazaqstandaǵy animatsiia salasyn odan ári damytý jónindegi usynystarǵa narazylyqtaryn bildirdi. Animatsiia salasynyń damý bolashaǵyn túsindirý maqsatynda jiynǵa jinalǵandarǵa Kinostýdiia basshylyǵy túsiniktemeler berip, kelissózder qorytyndysy boiynsha animatsiia salasynyń ókilderimen keńeitilgen jiyn ótkizý týraly sheshim qabyldandy", - dep jazdy "Qazaqfilm" ókilderi.
Kinostýdiia «Qazaqanimatsiia» ShB-ni Astana qalasyna kóshirý máselesi qaralyp jatqanyn jáne kásibi qoǵamdastyqpen mindetti túrde talqylaitynyn jetkizdi.
