«Qazaqfilm» kinostýdiiasynyń aýmaǵynda aty ańyzǵa ainalǵan kinorejisser, KSRO halyq artisi Sháken Aimanovtyń týǵanyna 108 jyl tolýyna orai eskertkishine gúl shoqtary qoiyldy.
Sondai-aq jaqynda ǵana 99 jasqa tolǵan QR halyq ártisi, Qazaqstan Respýblikasy Memlekettik syilyǵynyń laýreaty, Qazaqstannyń Eńbek Eri Iýrii Pomerantsevke arnalǵan eskertkish juldyzdyń saltanatty ashylýy ótti, dep habarlaidy QazAqparat.
Atalmysh sharaǵa densaýlyǵyna bailanysty Iýrii Pomerantsevtyń ózi qatysa almady.
Saltanatty sharaǵa «Qazaqfilm» kinostýdiiasy men M.Lermontov atyndaǵy memlekettik akademiialyq orys drama teatry basshylyǵy men ujymy, Ulttyq kinony qoldaý memlekettik ortalyǵynyń ókilderi, Sháken Aimanovtyń týǵan-týystary, belgili kinogerler men jýrnalister qatysty.
«Mine, 40 jylǵa jýyq bizdiń kinostýdiiamyz uly rejisser Sháken Aimanovtyń esimimen atalyp keledi. Ol bizdiń mádenietimizdiń damýyna úlken úles qosty. Sháken Kenjetaiuly zamandastarymen birge ulttyq kinonyń berik irgetasyn qalady. Sondai-aq, búgin qazaq kinosynyń juldyzdar alleiasynda «Bizdiń súiikti dáriger» filminde basty róldi somdaǵan QR halyq ártisi, Qazaqstannyń Eńbek Eri Iýrii Borisovich Pomerantsevke arnalǵan ataýly juldyz jandy», - dedi «Qazaqfilm» kinostýdiiasynyń prezidenti Aqan Sataev.
Atalǵan sharaǵa M.Lermontov atyndaǵy Ulttyq orys drama teatrynyń direktory Iýrii Iakýshev qatysyp, kinostýdiia basshylyǵyna iltipat bildirgeni úshin alǵys aityp, kelesi jyly Iýrii Pomerantsevtyń júz jyldyq mereitoiy toilanatynyn atap ótti.
Is-sharadan keiin Qazaq kinosynyń mýzeiinde qonaqtarǵa arnalǵan shaǵyn ekskýrsiia ótkizildi. Ekskýrsiia barysynda «Qazaqfilmniń» prezidenti Aqan Sataev jinalǵandarǵa jańǵyrtý baǵdarlamasy boiynsha kinostýdiiaǵa satyp alynǵan jańa kinotehnikany tanystyrdy.
