QR Mádeniet jáne sport ministri keshe Májiliste talqylanǵan Qazaqfilmdi jekeshelendirý máselesi týraly pikir bildirdi, dep xabarlaidy "Ult aqparat" Baq.kz agenttigine silteme jasap.
«Qýanysh Sultanovqa zor alǵys aitamyn. Bul óte ózekti suraq. Biregei jobamyz Qazaqfilmniń memleket qaramaǵynda qalǵanyn biz de qalaimyz. Satylymǵa Qazaqfilmniń 49%-y qoiylǵanyn atap óteiin. Qalǵan 51%-y báribir de memleket menshiginde qalady. Kinostýdiianyń memleket qaramaǵynda qalǵanyn biz de qalaimyz», - dedi ol.
Ministrdiń aitýynsha, Qazaqfilm 4-5 jyldan beri jekeshlendirýge shyǵarylǵan nysandar qatarynda. Alaida áli kúnge deiin ony satyp alatyn adam tabylmaǵan.
«Qazaqfilm – ulttyń múddesi. Qýanysh Sultanov aǵamyzǵa osy máseleni kótergeni úshin myń da bir raxmet. Qazaqfilm memleket menshiginde qalýy kerek. Nege deseńiz ol – bizdiń tarixymyz, keleshegimiz», - dedi Arystanbek Muxamediuly Úkimet qabyrǵasynda ótken baspasóz máslixatynda.
Ol satyp alýshy tabyla qalǵan jaǵdaida kinostýdiiany kino salasynda júrgen investor ǵana satyp alatynyn aitty.
«Satýǵa shyǵarylǵan nysandardyń óz zańdylyǵy bar. Mysaly, bir investor kelip Qazaqfilmdi alǵannyń ózinde ol tek qazaq kinosyn damytý jumysyn ári qarai jalǵastyrýy tiis, kino salasynan basqa qyzmet atqarýǵa ruqsat berilmeidi. Qazaqstandyq, sheteldik investor bolý kerek degen shekteý joq. Kinostýdiia baǵasyn QR Mádenet jáne sport ministrligi emes, Qarjy ministrligi janyndaǵy táýelsiz komissiia anyqtaidy. Alaida ázirge satyp alǵysy keletinder joq», - dedi ol.
Esterińizge sala ketsek, QR Parlamenti Májilisiniń jalpy otyrysynda depýtattardyń Qazaqfilm kinostýdiiasyn jekeshelendirýge qarsy shyqqandary týraly habarlaǵan bolatynbyz.
