QR Prezidenti Qasym-Jomart Toqaev «Qazaqstan» telearnasyna bergen suhbatynda qazaq jýrnalistikasynyń deńgeii týraly pikir bildirdi, dep habarlaidy QazAqparat.
«Jalpy qazaq jýrnalistikasynyń deńgeii tómen dep aitýǵa bolmaidy. Kerisinshe qazaq jýrnalistikasynyń deńgeii joǵary ekeni kúmánsiz. Qańtar oqiǵalary kezinde aqparattyq vakýým boldy. Ony kásibi turǵyda daiyndalǵan lańkester, qylmyskerler óz múddesine paidalandy. Internetti buǵattaýǵa májbúr boldyq. Bul – álemdik praktika. Biraq, basqa da aqparat quraldarymyz bar ǵoi. Sodyrlar keibir tele-radio arnalardyń ǵimaratyn órtep, qiratty. Odan basqa aqparat quraldary úzdiksiz habar taratty. Eshqandai shekteý bolǵan joq», - dedi Memleket basshysy.
Sondai-aq, ol eldegi sóz bostandyǵyna toqtaldy.
«Al, baspasóz bostandyǵyna kelsek, bizde zań boiynsha tsenzýra joq. Aqparat erkindigin barynsha qamtamasyz etip jatyrmyz. Biraq, erkindik degen oiyńa ne kelse, sony aitý emes. Kez-kelgen demokratiialyq elderde jalǵan aqparat taratqan adam jaýapqa tartylady. Men árbir jýrnalist, eń aldymen, memleketshil azamat bolýy kerek dep sanaimyn. Osy oraida N.Nekrasovtyń: «Aqyn bolý shart emes, azamat bolý – mindetiń» degen qanatty sózi bar. Sondyqtan árqaisymyz elimizdiń patrioty bolýǵa tiispiz», - dedi Prezident.
Onyń sózine qaraǵanda, ár jýrnalist «Aitylǵan sóz – atylǵan oq» degen halyq danalyǵyn nazarda ustaýy kerek.
«Osy rette, ókinishke qarai, keibir jýrnalister jalǵan aqparat taratyp, eldiń múddesine qarsy jumys isteidi. Qazirgi zamanda blogerler kóbeiip ketti. Olardyń keibir áreketteri keri áser etedi. Bir blogerler jaqsy jazady. Al ekinshi bireýleri máseleniń baiybyna barmai, zerttemei, ústirt qaraidy. Degenmen, azamattarymyz aq pen qarany ajyrata alady dep oilaimyn. Rasynda, aqparattyq «soǵys» búkil álemde bolyp jatqan úrdis. Sondyqtan, biz de oǵan beiimdelýimiz kerek», - dedi Qasym-Jomart Toqaev.
