Astanada qazaq tilin oqytý ortalyǵynyń basshysy Vladislav Ten "Alǵys kúninde" qazaq halqyna alǵysyn bildirdi, dep habarlaidy "Ult aqparat".
"Bizdiń ata-babalarymyz 1937 jyly deportatsiiaǵa ushyrap Qazaq jerine eriksiz kelip túskende qazaqtar olarmen sońǵy nanyn bólisip, ajaldan qutqaryp, kómek bergeni úshin korei halqynan alǵys bildiremin", - dep jazdy Vladislav Ten.
Aitýynsha, sol kezde qazaq halqy korei ata-babalaryna qol ushyn bermegende, ózi de, eki balasy da, kóptegen týǵan-týystary da bul dúniege kelmes edi. Sol úshin qazaq jeri koreiler úshin kieli ári qasietti jer dep sanaidy.
"Men Tashkent qalasynda týǵanmyn. Meniń Otanym, týǵan jerim - Ózbekstan. Áke-sheshem men týǵan qaryndasym menen buryn Qazaqstanǵa qonys aýdarǵan edi. Degenmen ata-anamnyń jalǵyz uly bolǵannan keiin korei mádenietin saqtaý úshin olarmen birge ómir súrýim kerek ekenin men de, olar da bilip, bir kúni olardyń "Balam, sen Astanaǵa kep osy jerde birge turaiyq!" degen shaqyrýymen osy jerge kelip men úshin jańa ómir bastalyp, qazaq tilin bilýge degen qyzyǵýshylyǵym artyp, bar yntammen oqyp úirene bastadym", - dep jazdy Ten.
Korei jigitine tek qana til emes, jalpy qazaq halqynyń ózi, salt-dástúri unai bastaǵan, maqaldaryn túsine bastaǵan. Sodan ózine: "Nege men qazaq tilin damytý úshin osynsha janymdy berip jumys jasap jatyrmyn?"- degen suraq qoiady. Sol suraǵynyń jaýabyn tapqanyn jazdy.
"Meniń oiymsha, Alla taǵala meni Qazaqstanǵa ata-babalarymnyń atynan alǵys aitý úshin jibergen siiaqty. Sol qiyn kezde meniń ata-babama kómek bergen qazaq halqyna degen qurmetimdi árqashan da alǵa qoiamyn.
Qazaq halqynyń eń jaqsy qasietteriniń biri bul - osy jerde turyp jatqan árbir halyqty qurmettei biledi. Mysaly, bizdi, korei halqyn, únemi “eńbekkor “dep ataidy. Bul bizdi joǵary baǵalai bilgeni dep eseptep, ári qarai Qazaq jeri úshin, onyń jan-jaqty damýyna jan aiamai, eńbek etýge daiynmyn", - dep jazdy Vladislav Ten.
Osylaisha korei jigiti qazaq tiliniń damýy men oqytýda eńbek ete bastaǵan. "Meniń maqsatym jáne armanym Qazaqstandaǵy barlyq adamdardyń qazaqsha erkin sóilei bilýi", -dep jazdy ol.
