Qazaq jastaryn jeltoqsan kóterilisinde qatygezdikpen qýǵyndaǵan adamdarǵa sol kezdegi memlekettik organdar medal berip, maqtaý qaǵazymen marapattaǵan. Qyz-jigitterdi soiylmen uryp, kúrekpen soǵyp, qan qaqsatqan áskerilerdi joǵary deńgeili syi-qurmetke bóleý qanshalyqty durys? Qazir qoǵamda seksen altyda bergen marpattardy qaitarý týraly qozǵalys bastaldy.
Yzǵarly jeltoqsanda qarýly jasaqtyń qyspaǵyna túsken esil taǵdyrlar. Qarakóz qaryndastyń balǵyn denesine túsken armarýtanyń izi. Qandyqol saqshylar sherýge toptalyp shyqqan jigitterdi kók ala qoidai qylyp sabap, qyzdardy shashynan súirep, tegis janshyp tastady. Namysty qazaq jastary alańda ǵana azap shekken joq, ailap, jyldap qýǵyn kórdi. Al óndirdei jastardyń oiran-topyryn shyǵarǵan 4000-nan astam adamǵa erligi úshin dep memleket tarapynan resmi marapat tabystaldy. Bul neniń qurmetine berilgen syi?..
22 marapat túri boiynsha jiyny 4169 adam syi-qurmetke bólendi. Kórimdiktei úlestirilgen kileń Ishki ister ministrligi men Joǵarǵy keńestiń Qurmet gramotalary, orden-medaldary. Onyń ádiletsizdik úshin berilgenin ýaqyttyń ózi dáleldep berdi. "Buiryq joǵarydan tústi" dep aqtalý arsyzdyq. Saiasatker Dos Kóshim olar buǵyp jatyp almai, marapatty qaita tapsyrǵany jón degen úndeý tastap otyr.
DOS KÓShIM, Saiasatker:
- Bul basqalarǵa úlgi bolar edi, jastarǵa. Jańaǵy adam quqyna qarsy buiryqtardyń bárine bastyq aitty dep, bas izep oryndai bermeńder. Sebebi, erteń aldaryńda zaýal bolady. Erteń adamdar suraidy sender ne istep edińder dep.
Aita keterligi, 4 myńnyń ishinen 37 adam ótken iske ókinip, marapatyn qaitaryp beripti. Al eń birinshi bolyp Almatyda áskeri qyzmette bolǵan qyrǵyz azamaty Talaibek Moldabekuly Joǵarǵy Keńes gramotasyn Muhtar Shahanov qurǵan komissiiaǵa joldapty.
TALAIBEK MOLDABEKULY, Burynǵy áskeri qyzmetker:
- Jazyqsyz jandardyń qany jaǵylǵan bul las zatty men keri qaitaramyn. Bul zat mende saqtalýǵa laiyq emes. Men fashist emespin, onyń ústine - máńgúrt emespin.
MANAS QAIYRTAIULY, Tilshi:
- Kólikteri árli-berli aǵylyp jatqan bul alańnyń osydan 30 jyl buryn aq qary qanǵa boialyp, Alashtyń azattyq jolyndaǵy taǵy bir armany oianǵan edi. Qazaq jastaryn qatygezdikpen uryp-soǵyp, jappai qýǵyndaýǵa úles qosyp, memleketten madaq estip, medal alǵandar marapattaryn urpaq aldynda aqtalyp, qaitaryp berse, qoǵamdaǵy áleýmettik-saiasi turaqtylyqtyń ornyǵýyna áser eter edi deidi úndeýdi qoldaýshylar.
Manas Qaiyrtaiuly, Dýman Súleimenov
