Qazaqstan Táýelsizdiginiń 25 jyldyǵyna orai elimizdegi qazaq-túrik litseileriniń ataýy ózgeretin boldy, dep habarlaidy BNews.kz.
«Ult kóshbasshysynyń tikelei qamqorlyǵynyń arqasynda Qazaqstanda «KATEV» halyqaralyq qoǵamdyq qory bilim berý salasynda ózindik ornyn tapty deýge bolady. Osynyń nátijesinde qazaq-túrik litseileriniń jumysy jandandy. Qor basshylyǵynyń sheshimimen (Qordyń Quryltaishylar keńesi men Qordyń Ǵylymi-ádistemelik keńesi), oqýshylar, ata-analar men litsei direktorlary QTL ataýyna «rebrending» jasaý, iaǵni «Bilim – innovatsiia litseii» dep ózgertý týraly bastamany qoldap otyr. Litsei ataýyn ózgertý Táýelsizdiktiń 25 jyldyǵyna orailastyrylǵan», – dep málimdedi qordyń baspasóz qyzmetinen.
Aita ketsek, «KATEV» halyqaralyq qoǵamdyq qory Qazaqstan men Túrkiia arasynda bilim berý salasyndaǵy ekijaqty yntymaqtastyqty damytý maqsatynda quryldy. Qazirgi tańda «KATEV» HQQ basqarýynda 27 memlekettik qazaq-túrik litseii bar.
