Qazaq tiliniń terminologiiasynda jasandy intellekt jáne robototehnika salalaryna qatysty 672 sóz bekitildi, dep habarlaidy QazAqparat.
Endi qazaq tilinde jasandy intellekt, derekterdi taldaý, robototehnika jáne kompiýterlik ǵylymdar salasynda qoldanylatyn kóptegen terminder men sózderdiń aýdarmalary bar. Ǵalymdar terminderdi aǵylshyn tilinen qazaq tiline aýdarýdyń ártúrli nusqalaryn qamtityn glossarii ázirledi. Ony Til saiasaty jónindegi komitetke bekitýge jiberdi.
«Biz jasandy intellekt, derekter taldaý jáne robototehnika salasyndaǵy kóptegen terminderdiń qazaq tilinde resmi bekitilgen aýdarmasy joq ekenin baiqadyq. Sondyqtan terminderdi qazaq tiline aýdarýdy bastadyq. Jasandy intellekt pen robototehnika salasy Qazaqstanda belsendi damyp jáne keń taralǵandyqtan, terminderdiń aýdarmasyn usyndyq», - dedi ISSAI negizin qalaýshy jáne direktory, professor Atakan Varol.
Lingvistika salasyndaǵy sarapshylar men ISSAI mamandarynyń qatysýymen ótken respýblikalyq terminologiialyq komissiianyń otyrystary barysynda keibir sózder aýdarmasyz qabyldandy jáne ózindik aǵylshyn tilindegi aitylýyn saqtap qaldy. Qalǵandary resmi túrde qazaqshaǵa aýdaryldy. Mysaly, artificial neural network termini «jasyl neirondyq jeli» dep aýdaryldy, al boosting termini qaryzǵa alynǵan sóz - býsting retinde paidalanýǵa sheshim qabyldandy. Barlyǵy 672 sóz resmi túrde bekitildi.
«Biz tsifrlyq ortada qazaq tiliniń damýyna úles qosa alǵanymyzǵa óte qýanyshtymyz», - dep qosty professor Varol.
Bekitilgen terminder ISSAI jáne termincom.kz saittarynda qol jetimdi.
