Foto:anatili.kazgazeta.kz
Qazaqstan Respýblikasy Ǵylym jáne joǵary bilim ministrligi Til saiasaty komitetiniń tapsyrysymen «Til-Qazyna» UǴPO-ǵy Abai.institute jobasy aiasynda qazaq tilin meńgerýdiń jańa joldaryn usynady. Sheteldegi qandastar men qazaq tiline qyzyǵýshylyq tanytqan azamattarǵa arnalǵan bul beinesabaqtar kez kelgen jastaǵy til úirenýshiler úshin yńǵaily ári qoljetimdi.Beinesabaqtardyń basty ereksheligi – kez kelgen ýaqytta oqýǵa bolady. Til úirenýshi dáristerdi onlain formatta, yńǵaily ýaqytta oqi alady. Ár taqyryp 10 minýtta qysqa ári naqty túsindiriledi. Qazirgi kezde A1, A2 (bastapqy deńgeiler) boiynsha 40 sabaq qoljetimdi. Ázirlengen beinedárister ámbebap ádisteme negizinde jasalǵan. Iaǵni qazaq tilin ózge tildiń kómeginsiz úiretýge arnalǵan bul tásil álemniń túkpir-túkpirindegi til úirenýshilerge tiimdi. Tildik ortaǵa boilaý ádisi álemde moiyndalǵan eń tiimdi til úiretý tásili sanalady.
Beinesabaqtar tildi keshendi túrde úiretýge baǵyttalǵan:
- Tyńdalym, aitylym, jazylym, oqylym daǵdylaryn damytý;
- Kúndelikti ómirge qajetti sózdik qor men grammatikalyq qurylymdardy meńgerý;
- Qazaq mádenieti men salt-dástúri týraly tanymdyq aqparat usynýǵa negizdelip jasalǵan.
Ár sabaq deńgeilik taqyrypqa sai eki bólimnen turady. Birinshi bólimde teoriia túsindirilse, ekinshi bólimde material epizodtyq kórinister arqyly beriledi.
Qazirgi tańda qazaq tilin meńgerýge suranys artýda. Sheteldegi qandastar úshin ana tilin meńgerý ulttyq biregeilikti saqtaýdyń joly bolsa, shetel azamattary úshin qazaq tili mádenietaralyq bailanys ornatýǵa múmkindik beredi. Abai.institute platformasy arqyly usynylǵan beinesabaqtar bul suranysqa jaýap beredi jáne til úirený protsesin jeńildetedi.
Beinesabaqtar Abai.institute portalynda jáne TilQazyna YouTube arnasyna júktelgen.
