«Aq jol» demokratiialyq partiiasy Qazaq Respýblikasy ataýyn qaitarýdy usyndy, dep habarlaidy "Ult aqparat".
«Biyl Alash avtonomiiasynan bastaý alatyn jáne qazirgi Qazaqstannyń negizin qalaǵan Qazaq Respýblikasyna 100 jyl toldy. Aldymen qatelesip Qyrǵyz avtonomiialyq respýblikasy dep atalyp, bes jyldan keiin Sultanbek Qojanuly, Sáken Seifýllin, Jalaý Myńbaiuly jáne basqa da tulǵalardyń arqasynda respýblikamyzǵa ultymyzdyń tól ataýy qaitaryldy.
Ótken jyly «Aqjol» demokratiialyq partiiasy Úkimetke bul tarihi datany resmi túrde atap ótýdi jáne Qazaqstan atymen qatar totalitarlyq Keńes biliginiń ózi moiyndaǵan Qazaq Respýblikasy ataýyn qoldaný týraly máseleni kóterdi. Bul bastamany Shoqan Ýálihanov atyndaǵy tarih institýty qoldady. Biraq bizdiń sheneýnikter únsiz qaldy. Sonda da biz tarihi birligimizdi bildiretin Qazaq Respýblikasy memlekettik ataýyn qaitarýdy jón dep sanaimyz», - dedi «Aq jol» demokratiialyq partiiasynyń tóraǵasy Perýashev partiia quryltaiynda.
Biyl mamyr aiynda «Aqjol» demokratiialyq partiiasy Prezident Q.Toqaevtyń stalindik qýǵyn-súrgin qurbandaryn aqtaý sharalaryn jalǵastyrý týraly tapsyrmasyna qoldaý bildirdi.
«Biz keńestik-totalitarlyq biliktiń qazaq halqyna ádeii jasaǵan asharshylyqty halyqaralyq deńgeide zulmat dep tanýǵa shaqyrdyq. Bolshevikter áskeriniń ujymdastyrý kezindegi júzdegen qazaq kóterilisin janshyp-basýyn, óz aýyldaryn qutqaramyn dep basyn ólimge tikken batyrlardyń erlik isterin qaita qaraý kerek dep sanaimyz. Tarihi ádildikti qalpyna keltirý úshin biz dekommýnizatsiia saiasatyn partiiamyzdyń resmi baǵyttarynyń biri dep jariialadyq», - deidi Azat Perýashev.
Aita keteiik, «Aq jol» demokratiialyq partiiasynyń XVI sailaýaldy quryltaiynda partiianyń sailaýaldy baǵdarlama jobasy usynyldy. Partiia tóraǵasy Azat Perýashev baǵdarlamadaǵy eń negizgi basymdyq – Táýelsizdik jáne Alash ulttyq ideiasy ekenin atap ótti.
