Osydan biraz ýaqyt buryn, teledidardan qytai jigitine turmysqa shyqqan qazaq qyzynyń taǵdyry týraly habar kórip qaldym. Sol kezde namysqa býlyǵyp, ishim ýdai ashyp edi. Álgi qarakóz qyzymyzdyń janary jasqa tolyp, músápir kúige túskende kókiregim qars aiyryla jazdady. Qazaq qyzy qytai azamatyna turmysqa shyqqannan keiin dám-tuzy jaraspai, tórkinine oralǵan eken. Qushaǵyndaǵy sábiine emirenip qoiady. Qaitsin, qytaidan týǵan bolsa da óziniń perzenti ǵoi. Qyzdyń aitýy boiynsha, kúieýinen kórmegen qorlyǵy joq. Aqyrynda ebin taýyp, elge oralypty.
Mine, sodan beri shetel azamattaryna kúieýge shyqqan qyzdarymyzdyń taǵdyry jaily jii oilanatyn boldym. Ózgeni bilmeimin, jeke óz basym salt-dástúri, dini basqa eldiń azamattaryna turmysqa shyqqan jáne shyqqysy keletin qyzdarymyzdyń tirligin quptai almaimyn. Óitkeni munyń astarynda óte kúrdeli másele jatyr. Jáne bul jaǵdai bizdiń demografiiamyzǵa keri áser etýde. Qazaqtar kóbeiýdiń ornyna azaiyp jatyr. Elimizde dúniege kelgen sábi – ózge ult azamatynyń qany men janynan bolsa qalai kúiinbeisiń?! Ásirese, qazaq qyzdary qytai azamattaryna shyǵyp jatsa...
Qazir qyzdarymyzdyń qytailyqtarǵa turmysqa shyǵýy nege jiilep ketti? Sebebi, kóshege shyǵyp, eki qadam jasasań, aldyńnan qytai shyǵady. Almaty qalasynyń ózinde ǵana búgingi tańda 100-den asa qytai meiramhanalary, 300-ge jýyq birlesken kásiporyn, 48 janarmai beketi, bir mádeniet ortalyǵy jáne adam sanyna jetip bolmaityn saýda ortalyqtary men saýdagerleri bar. Jáne solardyń barlyǵy – qaltaly qytailyqtar. Óz elinde áiel tapshy bolǵandyqtan, olar óz syńarlaryn syrttan izdeýge májbúr. Al Qazaqstan bolsa, olardy jan-jaqtan kirgizip, taptyrmas múmkindik berip qoidy. Qyzdarymyz da ket ári emes, qytaidyń qolynan ustap kete berýde. Osy rette qarakóz qyzdarymyz otbasynyń ónegesi – Otan ekenin myqtap uǵynǵany abzal. Ultymyzdyń taǵdyryna barlyǵymyz jaýaptymyz. Ásirese, qyzdarymyz úlken jaýapkershilikti sezinýi kerek. Sonda ǵana ajdaha eldiń aýzyna iligip ketý qaýpinen qutyla alamyz.
Bolat ShAIMANULY,
Almaty qalasy
"Jas Alash" gazeti
