Qazaq-qyrǵyz shekarasyndaǵy kólik keptelisi máselesi sheshimin tapty, dep habarlaidy QazAqparat.
«Qazaqstan men Qyrǵyz Respýblikasy shekarasynda kólik kezeginiń qalyptasý sebebin buǵan deiin BAQ arqyly QR Qarjy ministrligi túsindirgen bolatyn. Qazirgi tańda qazaq-qyrǵyz shekarasynda kóliktiń bolsyn, júk kóliginiń bolsyn jinalyp qalýy jaǵynan eshqandai problema joq. Maýsym aiynyń basynda máseleler týyndaǵan edi. Biraq onyń birneshe obektivti sebebi boldy: birinshiden karantin shekteýlerine bailanysty bizde ótkizý beketteriniń birazy jumysyn toqtatqan bolatyn. Alaida jaǵdai qiyndaǵan kezde de Qazaqstan júk tasymaldaýshylar úshin bir kún de shekarany japqan joq», - dedi QR UQK Shekara qyzmeti Shekaralyq baqylaý departamenti bastyǵynyń orynbasary, polkovnik Oleg Fisenko OKQ-daǵy baspasóz máslihatynda.
Jalpy, maýsymnyń basynda Qyrǵyz Respýblikasymen shekaradaǵy kóliktiń jinalyp qalýynyń taǵy bir sebebi jemis-jidektiń pisip, shekara arqyly ótkisi kelýshilerdiń kóbeiýýine bailanysty bolǵan.
«Ótkizý beketterinde Shekara qyzmeti eshqandai shekteý engizgen joq. Júk tasymaldarynyń baqylaýyn kúsheitpedi. Búgingi kúni ondaǵy ótkizý beketteriniń bári jumys istep tur. Másele sheshildi. Qazaqstan tarapynda da, Qyrǵyz Respýblikasy tarapynda da kóliktiń jinalyp qalý jaǵdaiy joq», - dedi ol.
Eske sala keteiik, biz buǵan deiin qazaq-qyrǵyz shekarasynda uzyn-sonar kólik kezegi qalyptasqanyn jazǵan bolatynbyz. Komitet buǵan jemis-kókónis ónimderi maýsymynyń bastalýy, QHR-men saýda-sattyqty jańartý jáne COVID-19 infektsiiasyna bailanysty 5 ótkizý pýnktiniń jumys istemei turǵany sebep boldy dep túsindirgen.
