Qazaqstannyń Qyrǵyzstanmen shekarasyndaǵy tekserý jáne ótkizý beketterinde kezek azaidy, dep habarlaidy Azattyq Qyrǵyzstannyń shekara qyzmetine silteme jasap.
4 jeltoqsan kúni tańerteń "At-Tilek" beketinde 55 júk kóligi qalǵan, basqa beketterde kezek bolmaǵan. Qazaqstan jaǵy shekarada júk kólikterin ótkizýdi 3 jeltoqsanǵa qaraǵan túnnen beri tezdetken.
2 jeltoqsanda Qazaqstan men Qyrǵyzstan úkimetteri shekaradaǵy jaǵdaidy retteý jónindegi "jol kartasyna" qol qoiǵan. "Jol kartasynda" shekaralyq, kólik, fitosanitarlyq jáne veterinarlyq baqylaý, kedendik jáne salyq salalary tárizdi eki jaqty áriptestiktiń ózekti máselelerin keshendi túrde sheshýdi kózdeitin 50 shara qamtylady. Sonyń ishinde jedel sipattaǵy 16 shara, sonymen birge bes qysqa merzimdi jáne 29 júieli shara engizilgen.
30 qarashada Qazaqstan prezidenti Nursultan Nazarbaev pen Qyrǵyzstan prezidenti Sooronbai Jeenbekov Minskide Ujymdyq qaýipsizdik sharty uiymy jiynynyń aiasynda kezdesip, shekara máselesin talqylaǵan. Kezdesýden soń prezidentter shekaradaǵy jaǵdaidy retteitin "jol kartasy" jeltoqsannyń sońyna deiin qabyldanatynyn habarlaǵan.
Qazaqstan Qyrǵyzstanmen shekaradaǵy baqylaýdy qazannyń 10-ynan bastap kúsheitilgen rejimge kóshirgennen keiin kórshi elden Qazaqstan aýmaǵyna ótý qiyndap ketken edi. Astana shekarada tekserýdiń kúsheitilgenin kontrabandamen kúres sharasy dep túsindirgen. Bishkek Qazaqstan jaǵy shekarada "qoldan kedergi jasap otyr" dep málimdegen.
Kei sarapshylar Astananyń mundai sharaǵa barýyn sol kezdegi Qyrǵyzstan prezidenti Almazbek Atambaevtyń "Qyrǵyzstannyń ishki isine aralasyp otyr" dep Qazaqstan basshylyǵyn synaǵan málimdemesimen bailanystyrǵan.
