Dúniejúzilik kóshpendiler oiyndarynda kókpardan Qazaqstan quramasy jartylai finalda Ózbekstannan ádeii jeńildi, dep málimdedi kókpardan Qyrǵyzstan komandasynyń burynǵy basshysy Talas Begaliev.
Jelide Begaliev Qazaqstan oiynshylary otyrǵan mikroavtobýsqa kirip, olardyń jartylai finaldaǵy oiynyn synǵa alǵany jaily video jariialandy. Ol qazaqtar ózbekstandyqtarǵa jeńisti qoldan bere saldy dep esepteidi. Begaliev sondai-aq ótken jyly Astanada ótken kókpardan álem chempionatynda qyrǵyzdar laiyqty óner kórsetip, barlyq erejege keliskenin eske salyp ótken.
Begaliev Sputnik Qyrǵyzstanǵa bergen suhbatynda qazaqtar qyrǵyzdarmen finalda oinaǵysy kelmedi degen pikir bildirdi.
"Biz bul salada kópten beri júrmiz, sportshylar týrnirge qalai qaraitynyn, oiynǵa qalai atsalysyp júrgenin bilemiz. Atqa qatysty oqiǵaǵa bárin jaba salýǵa bolmaidy. Qazaqstandyqtar bizben finalda oinaýǵa qoryqty, sondyqtan ózbekstandyqtardan jeńildi. Eki jyl buryn biz finalda jeńgenbiz, olar qaita kezdesýden qashty. Biz renjip otyrmyz, Dúniejúzilik kóshpendiler oiyndarynda da kórermenderdiń úmitin aqtaý kerek edi. Sportshylardyń biri Qazaqstan federatsiiasy óz oiynshylaryna "oinamańdar" degenin aitty", — dedi Begaliev.
Ol finalǵa boljam jasai otyryp, Qyrǵyzstan ulttyq komandasy finalda ózbekstandyqtardy oisyrata utady degen pikirin bildirdi.
Qazaqstan quramasynyń bapkeri Qanaǵat Súiinbaev túsinikteme berýden bas tartty, alaida sportshylar qola úshin oinaitynyn atap ótti.
