دٷنيەجٷزٸلٸك كٶشپەندٸلەر ويىندارىندا كٶكپاردان قازاقستان قۇراماسى جارتىلاي فينالدا ٶزبەكستاننان ەدەيٸ جەڭٸلدٸ, دەپ مەلٸمدەدٸ كٶكپاردان قىرعىزستان كومانداسىنىڭ بۇرىنعى باسشىسى تالاس بەگاليەۆ.
جەلٸدە بەگاليەۆ قازاقستان ويىنشىلارى وتىرعان ميكرواۆتوبۋسقا كٸرٸپ, ولاردىڭ جارتىلاي فينالداعى ويىنىن سىنعا العانى جايلى ۆيدەو جارييالاندى. ول قازاقتار ٶزبەكستاندىقتارعا جەڭٸستٸ قولدان بەرە سالدى دەپ ەسەپتەيدٸ. بەگاليەۆ سونداي-اق ٶتكەن جىلى استانادا ٶتكەن كٶكپاردان ەلەم چەمپيوناتىندا قىرعىزدار لايىقتى ٶنەر كٶرسەتٸپ, بارلىق ەرەجەگە كەلٸسكەنٸن ەسكە سالىپ ٶتكەن.
بەگاليەۆ Sputnik قىرعىزستانعا بەرگەن سۇحباتىندا قازاقتار قىرعىزدارمەن فينالدا ويناعىسى كەلمەدٸ دەگەن پٸكٸر بٸلدٸردٸ.
"بٸز بۇل سالادا كٶپتەن بەرٸ جٷرمٸز, سپورتشىلار تۋرنيرگە قالاي قارايتىنىن, ويىنعا قالاي اتسالىسىپ جٷرگەنٸن بٸلەمٸز. اتقا قاتىستى وقيعاعا بەرٸن جابا سالۋعا بولمايدى. قازاقستاندىقتار بٸزبەن فينالدا ويناۋعا قورىقتى, سوندىقتان ٶزبەكستاندىقتاردان جەڭٸلدٸ. ەكٸ جىل بۇرىن بٸز فينالدا جەڭگەنبٸز, ولار قايتا كەزدەسۋدەن قاشتى. بٸز رەنجٸپ وتىرمىز, دٷنيەجٷزٸلٸك كٶشپەندٸلەر ويىندارىندا دا كٶرەرمەندەردٸڭ ٷمٸتٸن اقتاۋ كەرەك ەدٸ. سپورتشىلاردىڭ بٸرٸ قازاقستان فەدەراتسيياسى ٶز ويىنشىلارىنا "ويناماڭدار" دەگەنٸن ايتتى", — دەدٸ بەگاليەۆ.
ول فينالعا بولجام جاساي وتىرىپ, قىرعىزستان ۇلتتىق كومانداسى فينالدا ٶزبەكستاندىقتاردى ويسىراتا ۇتادى دەگەن پٸكٸرٸن بٸلدٸردٸ.
قازاقستان قۇراماسىنىڭ باپكەرٸ قاناعات سٷيٸنباەۆ تٷسٸنٸكتەمە بەرۋدەن باس تارتتى, الايدا سپورتشىلار قولا ٷشٸن وينايتىنىن اتاپ ٶتتٸ.
