Qazaq halqynyń jaqsylyǵyn eshqashan umytpaq emespiz. Bul týraly Aqsai qalasynda turatyn óńirge tanymal dáriger Valentin Iýn málim etti, dep habarlaidy QazAqparat tilshisi.
Onyń aitýynsha, basyna qiyn-qystaý kún týǵanda baitaq qazaq dalasyna kóship kelgender kóp.
Sonyń ishinde stalindik zulmat zaman ústemdik qurǵan ótken ǵasyrdyń otyzynshy jyldary káris ultynyń ókilderi de qazaq jerine deportatsiialandy.
Óz jerinen qýǵynǵa ushyraǵandar qatarynda Iýnniń de otbasy boldy. Bir túnniń ishinde tutastai aýyldy eshteńe aitpastan, poiyzǵa tiep, alyp ketken. Mal tasityn vagondarda eńbektegen sábiden bastap eńkeigen kárige deiin adam aitqysyz aýyr kúi keship, bir ai jol júrgen. Jolda birde-bir stansaǵa aialdamastan, Qaraǵandyǵa jetkizgen.
«Jergilikti halyqqa «halyq jaýlaryn» ákele jatqandaryn aityp, eshkimge qolushyn bermeýge buiryq bergen. Mine, soǵan qaramastan, ózderi tipti ash qursaq bolsa da, qazaqtar qolushyn sozyp, aldymen qariialar men sábilerdi tamaqtandyryp, úilerine kirgizip jylytty. Shetke qaqqan joq, baýyryna tartty. Sondai meiirimdi adamdardyń arqasynda bárimiz aman qaldyq. Men sol kezde bir jasta ekenmin. Alǵashqy jyly bizdi qazaqtar óz shańyraqtaryna jatqyzyp, qamqorlady. Kelesi jyly birtindep ózimiz úi salyp alyppyz. Sodan beri Qazaqstandy mekendep, óz Otanymyzda ómir súrip kelemiz», deidi Valentin Iýn.
Káris ultynyń ókilderi bul jaqsylyqty umytqan joq. Sonyń dálelindei 2012 jyly Oralda «Qazaq halqyna myń alǵys!» atty monýment ornatyldy. Jyl saiyn osy eskertkish janynda túrli sharalar ótedi.
Biyl da Alǵys aitý kúnine orai Aq Jaiyq jurtshylyǵy eskertkish janyna jiylyp, gúl shoqtaryn qoidy. Qazaq halqyna degen shynaiy ynta-yqylasyn, qurmetin osylaisha bildirdi.
«Biz qazaq halqyna máńgilik qaryzdarmyz. Bul – barsha káris ulty ókilderiniń pikiri. Táýelsiz qazaq eliniń odan ári órkendep, damýyna biz de úlesimizdi qosa beretin bolamyz», dep túiindedi oiyn Valentin Iýn.
.jpeg)