Foto: videodan skrinshot
Qaraǵandyda áleýmettik jelilerde qazaq halqy týraly qorlaityn pikir jazǵany úshin ultaralyq arazdyqty qozdyrdy degen aiyppen sottalyp jatqan Alika Muhamadievanyń isi qaralyp jatyr, dep habarlaidy Ult.kz Qaz365.kz saityna silteme jasap.
Sot otyrysynda memlekettik aiyptaýshy óz ustanymyn baiandap, Muhamadievany QR Qylmystyq kodeksiniń 174-babynyń 1-bóligi boiynsha kináli dep tanýdy surady.
«Jaza taǵaiyndaý kezinde qylmystyń qoǵamdyq qaýiptilik dárejesin, aiyptalýshynyń jeke basyn jáne onyń istegen áreketke deiingi jáne keiingi minez-qulqyn eskerýdi suraimyn», – dedi prokýror.
Aiyptaýshynyń aitýynsha, Muhamadievanyń áreketinde jazany jeńildetetin mán-jailar bar: ol jasaǵan isine ókinip, kinásin moiyndaǵan jáne onyń qaraýynda kámeletke tolmaǵan balasy bar. Al aýyrlatatyn jaǵdailar anyqtalmaǵan.
«Sottan aiyptalýshyǵa 4 jyl 6 ai merzimge bas bostandyǵynan aiyrý jazasyn taǵaiyndaýdy suraimyn. Jaza ortasha qaýipsizdik deńgeiindegi túzeý mekemesinde ótelsin. Merzim ustalǵan kúnnen bastap eseptelsin», – dedi prokýror.
QR Qylmystyq kodeksine sáikes, Muhamadievaǵa jazany óteýdi balasy 14 jasqa tolǵanǵa deiin shegerý múmkindigi qarastyrylǵan.
Prokýror sondai-aq sottalýshydan 78 640 teńge mólsherinde Qorǵaý qoryna jáne 751 012 teńge kóleminde sot saraptamalarynyń shyǵynyn óteý úshin memleket paidasyna óndirip alýdy usyndy.
Aiyptaý tarabynyń sózinen keiin qorǵaýshyǵa sóz berildi.
Advokat Timýr Solodýha sottan aiyptalýshynyń ókinip, kinásin moiyndaǵanyn, tergeýge belsendi kómekteskenin jáne buryn sottalmaǵanyn eskerýin surady.
«Sottan adamgershilik tanytyp, Muhamadievanyń shyn júrekten ókinip otyrǵanyn, balasynyń bar ekenin jáne óziniń ádil jaza alýǵa daiyn ekenin eskerýdi ótinemin. Ol qateligin túsindi, endi mundaiǵa jol bermeidi», – dedi advokat.
Qorǵaýshynyń aitýynsha, Muhamadieva ózine taǵaiyndalǵan barlyq aiyppul men sot shyǵynyn tóleýge daiyn.
Alika Muhamadievanyń isi boiynsha túpkilikti úkim aldaǵy ýaqytta jariialanady.
