Almatydaǵy Áýezov atyndaǵy Qazaq memlekettik akademiialyq drama teatrynda Qazaqstannyń halyq ártisi Zámzágúl Sháripovamen qoshtasý rásimi ótti, dep habarlaidy "Ult aqparat" Sputnik Qazaqstan agenttigine silteme jasap.
Aty ańyzǵa ainalǵan teatr jáne kino ártisimen qoshtasýǵa júzdegen adam keldi, onyń ishinde áriptesteri, mádeniet jáne sport ministrligi men Almaty kalasy ákimdiginiń ókilderi, almatylyqtar bar.
"Qazaqstannyń halyq ártisi, kórnekti kino jáne teatr aktrisasy, shyǵarmashylyǵynyń 60 jylǵa jýyǵyn Muhtar Áýezov atyndaǵy Qazaq memlekettik drama teatryna arnaǵan óner qairatkeri Zámzágúl Núsipbaiqyzy Sháripova uzaqqa sozylǵan aýyr naýqastan keiin dúnie saldy. Bul oqiǵa Qazaqstannyń óneri men mádenieti úshin orny tolmas qaiǵy. 1953 jyly Muhtar Áýezov teatrynyń akterlik quramyna qabyldanǵan Zámzágúl Núsipbaiqyzy sol ýaqyttan beri úzilissiz osy teatrda qyzmet etti. Akterlyq diapazony keń aktrisa ulttyq dramatýrgiia men dúniejúzilik klassikadan san qyrly júzden asa beine somdady. Zámzágúl Sháripovanyń óner joly jas urpaq úshin úlgi bolyp qala beredi", — dedi Áýezov atyndaǵy Qazaq memlekettik akademiialyq drama teatrynyń direktory Ashat Maksimuly.
Mádeniet jáne sport ministrligiń jaýapty hatshysy Qýatjan Ýáliev QR prezidenti Nursultan Nazarbaevtyń yqtiiar hatyn jinalǵan qaýymǵa oqyp berdi.
"Búgin zamanymyzdyń zańǵar, teatyrmyzdyń kórkem, tabiǵat bergen sulýlyǵy mol, halqymyzdyń súiikti qyzy Zámzágúl Núsipbaiqyzyn shyǵaryp salǵaly turmyz. Zámzágúl teatrǵa orasan zor eńbek sińirdi, teatr ónerin birneshe saty joǵary kóterdi. Zámzágúldiń syrtqy formasy men ishki jan dúniesi bir-birine sai sulý bolatyn. Halqymyzdyń súiiktisi aramyzdan ketip otyr. Jas ketti dep aita almaimyn, biraq qansha jasta bolsyn mundai adamnyń qazasy halyq úshin qaiǵyly jaǵdai. Jatqan jeri jaily, topyraǵy torqa, jany jánnatta bolsyn. Zámzágúldi ómirbaqi júregimizde saqtaimyz", — dedi Qazaqstannyń halyq ártisi Asanáli Áshimov.
Zámzágúl Sháripova 1931 jyly Almaty oblysy Jambyl aýdany HH partsezd aýylynda dúniege kelgen. 1947 jyly Almatynyń Joǵarǵy kinoakterler mektebin bitirip, "Qazaqfilm" kinostýdiiasynda jáne Qazaq radiosynda qyzmet etti. 1953 jyly M.Áýezov teatrynyń akterlik quramyna qabyldanǵan.
Sháripova ulttyq klassika men zamanaýi dramatýrgiiada Áýezovtiń "Aiman-Sholpanynda" Aiman, "Qaragózinde" Qaragóz, Músirepovtiń "Aqyn tragediiasynda" Aqtoqty, Muhamedjanovtyń "Jat elde" dramasynda Eva Braýn, Tájibaevtyń "Kóńildesterinde" Dámesh, Baiseiitov pen Shańǵytbaevtyń "Beý, qyzdar-ai!", "Oi, jigitter-ai!" komediialarynda Nursulý, Júnisovtiń "Ajar men Ajalynda" Ajar, Isabekovtiń "Ápkesinde" Qamajai, A.Bekbosynnyń "Sońǵy seziminde" Ana, Býliakovtyń "Otyz ulyń bolǵansha…" komediiasynda Sálima rólderin somdady.
Eske sala keteiik, qazaqstannyń halyq ártisi, "Otan" ordeniniń iegeri Zámzágúl Sháripova 15 shildede qaitys boldy.
