Aqtóbeniń shalǵai aýdanynda turatyn Antonina Evdokimovanyń ulty orys bolsa da qazaqy tárbie alǵan. Bir aýyldaǵy jalǵyz ózge ult ókili qazir Tania áje atanyp ketken, dep habarlaidy QazAqparat.
Antonina Evdokimova Yrǵyz aýdanynyń Aqshi aýylynda turady. Qariia nemere-shóbere qyzyǵyn kórip, aýylda «Tania áje» atanyp ketti. Ol 1953 jyly Ózbekstannyń Seihýndariia oblysyna qarasty Termez qalasynda dúniege kelgen. Ákesi áskeri qyzmetker, anasy dáriger boldy. 1964 jyly anasynyń jumys babymen shalǵai, qazaq aýylyna qonys aýdardy. Sodan beri alysqa uzap shyqqan emes.
«Men qoi qyrqyp, siyr saýyp, pishende júrdim. 1969 jyldyń shilde aiynda Amangeldi Bólekbaev áskerden kelip, turmys qurdym. Ózim 11 qursaq kótergen edim. Qazir 5 balam bar. Qaiyn inimniń jetim qalǵan tórt balasyn baýyryma basyp, ósirdim, tórt aýyl ettim. Balalarym da kópbalaly», - dedi Antonina Evdokimova.
Yrǵyz aýdanynyń birneshe aýyly men oblys ortalyǵyndaǵy balalary qariianyń jan jylýy, júregi. Densaýlyǵy myǵym, júris-turysy shiraq Tania áje zeinetke shyqqan soń toqyma toqydy. Nemerelerine qajetti jyly kiimniń bárin ózi túgeldep berip otyr.
«Jún tútip, urshyq iiremin. Nemerelerimdi kiindiremin, suraǵan adamdardyń ótinishin aiaqsyz qaldyrǵan emespin. Bul anamnan qalǵan óner», - dedi ol.
Qazaq otbasyna kelin bop túsken kúnderin eske alǵan qariia elgezektiginiń arqasynda úlken men kishige izet kórsetip, búkil aýyldyń anasy atandy.
«Jan-jaǵyńa qara, ne istese, sony qaitala» dep atam aitqan edi. Sóitip júrip tildi úirendim, tez aralasyp kettim. Qazir qazaqsha sóileimin. 50 jyldan astam ýaqytta orys tilin de umyta bastadym. Salt-dástúrdi bilemin. Kelin túsiný, ony tárbieleý, bala ósirý, qonaqjailylyǵy bári-bári men úshin ystyq. Úilený toiy, týǵan kún, súndet toi da qazaq dástúrimen ótedi. Qazaq eli meni ortaǵa alyp, óz balasyndai tárbieledi. Sondyqtan alǵysym sheksiz», - dedi Antonina Evdokimova.
Ol án de aitady. Qoǵamdaǵy erekshe belsendiligi úshin Qazaqstan halqy Assambleiasy jylyna orai aýdannyń «Jyl adamy» atandy.
«2010 qurylǵan ájeler ansambliniń múshesi óte belsendi. Aýyl, aýdandaǵy sharalarǵa qatysyp júr. Marapaty kóp, maqtaýly qariia», - dedi aýyl klýbynyń mádeni jumysyn uiymdastyrýshysy Kúnsulý Qapizova.
