Foto: Filarmoniianyń baspasóz qyzmeti
Jambyl atyndaǵy Qazaq memlekettik akademiialyq filarmoniiasynyń Úlken zalynda dańqty kompozitor, kúishi, Halyq Qaharmany Nurǵisa Tilendievtiń 100 jyldyǵyna arnalǵan Respýblikalyq dirijerler konkýrsynyń Gala-kontserti ótti, dep habarlaidy Ult.kz.
Qazaqstan Respýblikasy Mádeniet jáne aqparat ministrliginiń qoldaýymen ótken eki kúndik óner básekesinde elimizdiń túkpir-túkpirinen kelgen 23 úmitker baq synap, olardyń arasynan segiz finalist ekinshi kezeńge ótken bolatyn.
Gala-kontsert shymyldyǵy N.Tilendiev atyndaǵy «Otyrar sazy» akademiialyq folklorly-etnografiialyq orkestriniń oryndaýyndaǵy «Meniń babam Qarasai» kúiimen ashyldy. Konkýrs barysynda qazylar alqasynyń talqylaýynan keiin erekshe oqiǵa oryn alǵan bolatyn. Joǵary baǵaǵa ie bolǵan kásibi dirijerlar Mádi Ómirzaqov pen Qýanysh Ismailov izgilik tanytyp, ini-qaryndastaryna jol berdi. Bul qadamǵa riza bolǵan qazylar alqasynyń músheleri E.Rahmadiev atyndaǵy Memlekettik akademiialyq filarmoniiasy Simfoniialyq orkestriniń kórkemdik jetekshisi, «Astana Opera» memlekettik opera jáne balet teatrynyń dirijeri, Qazaqstannyń halyq ártisi Abzal Mýhitdinov pen Qyzylorda oblystyq simfoniialyq orkestriniń kórkemdik jetekshisi jáne bas dirijeri, Qazaqstannyń eńbek sińirgen qairatkeri Músilim Baltabaiuly Ámze qos dirijerǵa Astana qalasy ákimdiginiń E.Rahmadiev atyndaǵy memlekettik akademiialyq filarmoniiasynyń Simfoniialyq jáne Qazaq orkestrlerimen birlesip jeke kontsert ótkizýge arnaiy joldama usyndy.
Marapattaý rásimi odan ári jalǵasyp, Arshat Shárip, Dáýrenbek Súiindik úzdik ónerleri úshin arnaiy diplomdarmen jáne 200 000 teńge sertifikattarmen marapattalsa, astanalyq Dina Ardaq «N. Tilendievtiń shyǵarmalaryn úzdik oryndaǵany úshin» nominatsiiasyn jeńip aldy. Qazylar alqasynyń músheleri E.Rahmadiev atyndaǵy Memlekettik akademiialyq filarmoniiasy Qazaq orkestriniń kórkemdik jetekshisi jáne bas dirijeri, Qazaqstannyń eńbek sińirgen qairatkeri, «Parasat» ordeniniń kavaleri, professor Aitqali Jaiymov pen baýyrlas Qyrǵyz elinen kelgen Bishkek qalasy ákimdigi mádeniet basqarmasynyń halyq aspaptar orkestriniń bas dirijeri, Qyrǵyzstan Respýblikasynyń halyq ártisi Bakytbek Tilegenov III oryn iegerleri Qabyl Arnat, Ǵabitov Dáýlet jáne Raqyshev Abaidy 400 000 teńgeniń sertifikaty jáne arnaiy diplommen marapattady.
Al qazylar alqasynyń tóraǵasy N. Tilendiev atyndaǵy akademiialyq folklorly- etnografiialyq «Otyrar sazy» orkestriniń kórkemdik jetekshisi jáne bas dirijeri, Qazaqstannyń eńbek sińirgen qairatkeri, «Parasat», «Qurmet» ordenderiniń kavaleri Dinzýhra Tilendieva II oryn tuǵyrynan kóringen Áli Saparbekti 600 000 teńge sertifikat jáne arnaiy diplommen marapattady. Konkýrstyń eń basty júldesi Nurǵali Áshimhanǵa buiyryp, oǵan I oryn diplomyn jáne 1 000 000 teńge sertifikatty Qazaqstan Respýblikasy Mádeniet jáne aqparat vitse-ministri Aibek Sydyqov saltanatty túrde tabystady. Erekshe aita ketetin jait, konkýrsqa qatysqan barlyq úmitkerler Qazaqstan Respýblikasy Mádeniet jáne aqparat ministri Aida Balaevanyń Alǵys hatymen marapattaldy.
Gala-kontsertte jeńimpazdar men laýreattar óz ónerlerin kórsetip, jeńimpaz atanǵan Nurǵali Áshimhan N.Tilendievtiń «Altyn dán» shyǵarmasyna dirijerlyq etti. Kesh sońynda orkestrdiń kórkemdik jetekshisi Dinzýhra Tilendieva N.Tilendievtiń «Mahambet» kúiine dirijerlyq etip, finalda áigili «Qustar ánin» búkil zal birge shyrqap, uly kompozitordyń rýhyna qurmet kórsetildi. Kontsert sońynda ónerpazdarǵa QR Mádeniet jáne aqparat ministrliginiń yqylas gúli tabystaldy.
Kúishi-kompozitor, dirijer, Halyq qaharmany, qazaq halqynyń dańqty perzenti Nurǵisa Tilendievtiń 100 jyldyǵyna arnalǵan bul tarihi konkýrs jas dirijerlerge jol ashyp, qazaq óneriniń bolashaǵyn aiqyndai tústi.
