Qazaq ádebietiniń jinaqtary qytai, arab tilderinde jaryq kóredi, dep habarlaidy "Ult aqparat".
22 qazanda Astanada «Rýhani jańǵyrý» baǵdarlamasyn júzege asyrý jónindegi ulttyq komissiia men «Jahandaǵy zamanaýi qazaqstandyq mádeniet» jobasyna qatysýǵa niet bildirgen Qytai Halyq Respýblikasynyń «Ulttar baspasy», sondai-aq Egipet Arab Respýblikasynyń Mádeniet jáne bilim ortalyǵy arasynda yntymaqtastyq týraly memorandýmǵa qol qoiyldy.
Kelisim aiasynda seriktester Qazaqstan tarapyna qazirgi qazaq ádebetietiniń úzdik úlgilerin qytai, arab tilderine aýdarýǵa, sonymen qatar ony baspadan shyǵaryp, taratýǵa járdemdesedi.
Ulttar baspasy – Qytai Halyq Respýblikasynyń aýdarmaǵa mamandanǵan arnaýly memlekettik uiymy. Ol jyl saiyn Qytaida turatyn 56 etnostyń tilinde jalpy tirajy 20 million danaǵa deiin mynǵa jýyq kórkem ádebietti baspaǵa daiarlaidy. 1953 jyldan beri baspanyń qazaq redaktsiiasy jumys istep keledi.
Al, Egipet Arab Respýblikasynyń Mádeniet jáne bilim ortalyǵy – arab tili men mádenietin keńinen nasihattap, Mysyr jáne basqa elder arasynda mádeni-gýmanitarlyq bailanystardy nyǵaitýmen ainalysatyn bedeldi uiymdardyń biri. Ortalyqtyń 25 elde ókildigi bar.
Qazaqstan tarapynan memorandýmǵa qol qoiǵan «Rýhani jańǵyrý» baǵdarlamasyn júzege asyrý jónindegi ulttyq komissiianyń hatshysy Aida Balaeva Qazaqstan Prezidenti N.Á.Nazarbaevtyń bastamasymen qolǵa alynǵan jobanyń airyqsha mańyzy men joǵary mártebesine toqtaldy. Qazaq prozasy men poeziiasynyń tańdamaly jinaǵy osyndai aýqymda shyǵarylýy alǵash ret. Antologiia BUU-nyń 6 tilinde jaryq kórip, aǵylshyn, arab, qytai, ispan, orys jáne frantsýz tilderinde sóileitin elderge tegis taratylady.
Óz kezeginde QHR Ulttar baspasynyń orynbasary, Gao Li hanym qytai taraby basylymnyń sapasyn qamtasyz etý úshin bar bilimderi men tájiribesin jumsaitynyna sendirdi. Gao Li hanymnyń aitýynsha, Ulttar baspasy úshin álemge áigili iri baspalarmen birge osyndai aýqymdy jobaǵa qatysý – úlken mártebe.
Egipet Arab Respýblikasy Mádeniet jáne bilim ortalyǵynyń direktory Hemdan Ibragim antologiiany aýdarý, basyp shyǵarý barysynda arab álemi men Qazaqstan arasynda ekijaqty mádeni-gýmanitarlyq bailanystar nyǵaiyp, Qazaqstan men Egipettiń yntymaqtastyǵy arta túsetinine senim bildirdi.
Aita ketsek, qazirgi qazaq ádebietiniń ozyq úlgileriniń jinaǵy BUU-nyń 6 tiline (aǵylshyn, arab, ispan, qytai, orys, frantsýz tilderine) aýdarý «Jahandaǵy zamanaýi qazaqstandyq mádeniet» jobasy aiasynda júzege asyrylyp otyr. Joba, óz kezeginde, Qazaqstan Prezidenti N.Á.Nazarbaev usynǵan «Rýhani jańǵyrý» baǵdarlamasynyń quramdas bóligi sanalady. Jobanyń maqsaty – álemge qazaq ádebietiniń, mýzyka jáne beineleý óneriniń, horeografiiasynyń, kino jáne teatr salasynyń táýelsizdik jyldardaǵy jetistikterin kórsetý. Joba aiasynda qazirgi qazaq ádebietiniń qos antologiiasy baspaǵa ázirlenip jatyr. Olar – «Qazirgi qazaq prozasynyń antologiiasy» jáne «Qazirgi qazaq poeziiasynyń antologiiasy». Ár antologiianyń kólemi – 600 bet, árqaisysyna 30 avtordan enedi. Antologiianyń qurylymy men mazmuny Qazaqstan Jazýshylar Odaǵynda ótken arnaiy jiynda bekitildi.
Qazirgi tańda jobanyń basty seriktestikteri anyqtalyp, kelissózder aiaqtala keldi. Máselen, jinaqtyń aǵylshyn tilindegi nusqasyn daiarlaýǵa Kembridj ýniversitetiniń baspasy atsalyssa, ispan tilindegisi Ispaniianyń mádeniet ministrligi jáne Servantes institýty, frantsýz tilindegisi Parij meriiasy men Frantsiianyń Ulttyq kitap ortalyǵynyń qoldaýymen daiyndalady. Antologiianyń orys tilindegi nusqasyn Máskeý memlekettik ýniversitetiniń Baspa úii, qytai tilindegisin – QHR Ulttar baspasy, al arab tilindegisin Egipet Arab Respýblikasynyń Mádeniet jáne bilim ortalyǵy aýdaryp, basyp shyǵarýǵa járdemdesedi. Qazaqstan tarapynan jobany «Ulttyq aýdarma biýrosy» qoǵamdyq qory júzege asyrady.
