Parijde qazaq ádebietiniń qos antologiiasyn frantsýz tiline aýdarý, basyp shyǵarý men taratý jumystaryna qatysty kelissózder aiaqtaldy.
Joba qatysýshylary Parijdiń birinshi okrýginiń basshylyǵy men elorda mádeni birlestiginiń qoldaýymen suryptaldy. Olar - burynnan Qazaqstannyń rýhani qoldaýshysy ári jobanyń strategiialyq seriktesteri. Sondai-aq, qazaq ádebietin aýdaryp, nasihattaý bastamasyn sapa máselesine jaýap beretin baqylaýshy-retsenzent retinde Frantsýz Ulttyq kitap ortalyǵy qoldady.
«Rýhani jańǵyrý» baǵdarlamasyn júzege asyrý jónindegi ulttyq komissiia kóptegen frantsýz baspasynyń jáne strategiialyq seriktesterdiń usynysyn saralai kele, óner jáne ádebietti dáripteý boiynsha aýdarma hám baspa isinde 30 jyldan astam tájiribesi bar Mishel De Mol (Michel de Maule) baspasyn tańdaýdy uiǵardy. Onyń negizin salýshy jáne bas redaktory - tanymal frantsýz lingvisi, aqyn Terri-de-la-Krýa (Thierry de La Croix).
Ádebietshi ári baspager Terri-de-la-Krýa memorandýmǵa qol qoiý barysynda bul joba arqyly frantsýz oqyrmany álem mádeni keńistigindegi ózgeshe álemdi ashatynyn jáne onyń zor áleýetke ie ekendigin atap aitty. Parij Mádeni birlestiginiń prezidenti madam Karla Origoni (Carla Arigoni) jobanyń akademiialyq mańyzdylyǵyn tilge tiek etti. Onyń pikirinshe, antologiia ádebi jáne estetikalyq qundylyǵynan bólek, ǵylymi turǵyda da airyqsha mánge ie.
Qaýymdastyq aldaǵy jumystarǵa ádebiet, mádeniettaný jáne aimaqtaný salalarynyń bilikti mamandaryn tartýdy josparlap otyr. Olar frantsýz oqyrmanyna Qazaqstan mádenietin jan-jaqty ári kásibi úlgide usynbaq.
Joba aiasynda antologiiany tek Frantsiiada emes, sondai-aq, frantsýz tili resmi túrde qoldanylatyn nemese negizgi tilmen qatar paidalanylatyn elderde taratý boiynsha úlken jumys atqarylmaq. Álemde mundai elder sany 50-den asyp jyǵylady. Al, frantsýz tilin kúndelikti ómirde qoldanatyn halyq sany 220 million. Qazaq ádebietin atalmysh elderde keńinen tanytyp, nasihattaý jumystarymen frantsýz tili keń etek jaiǵan memleketterde tanymal «Prestij Kommýnikatsion» (Prestige Communication) jahandyq agenttigi ainalysady.
Halyqaralyq agenttiktiń bas direktory Loran Taib (Laurent Taieb) yntymaqtastyq ornatý memorandýmyna qol qoiý kezinde eldi mádeniet, rýhani jádigerleri men ishki damýy arqyly álemge tanytýǵa jol ashatyn «Rýhani jańǵyrý» baǵdarlamasynyń mańyzy men rólin erekshe atap ótti.
Memorandýmǵa qazaqstandyq taraptan «Rýhani jańǵyrý» baǵdarlamasyn júzege asyrý boiynsha Qazaqstan Prezidenti janyndaǵy Ulttyq komissiia hatshysy Aida Balaeva qol qoidy. Ol seriktesterge aýdarmalardyń kórkemdik dáldigi men estetikalyq sipatyn qamtamasyz etýdi tapsyrdy.
Frantsiiadaǵy Qazaqstan elshiliginiń ǵimaratynda ótken kelissózderge Frantsiiadaǵy QR Elshisi Jan Ǵaliev jáne «Ulttyq aýdarma biýrosynyń» direktory Raýan Kenjehanuly qatysty.
