Álemniń 6 tiline aýdarylǵan qazaq ádebieti antologiialary 120 myń danamen basylyp shyqty. «Jahandaǵy zamanaýi qazaqstandyq mádeniet» jobasy aiasynda aýdarylǵan antologiialar endi sheteldegi iri kitaphanalarǵa taralatyn bolady, dep habarlaidy QazAqparat.
Saltanatty sharaǵa QR Memleket hatshysy Qyrymbek Kósherbaev, QR Mádeniet jáne sport ministri Aqtoty Raiymqulova, Almaty ákimi Baqytjan Saǵyntaev qatysty.
«Bul jobany uiymdastyrý jáne úilestirý júiesi de burynǵydan ózgeshe boldy. Ondaǵy basty maqsat kórkem aýdarmanyń joǵary sapasyn qamtamasyz etý bolatyn. Ol úshin eń aldymen jobany júzege asyrýǵa 6 eldegi kórkem aýdarma salasynda tájiribesi mol, bedeldi degen baspalar tańdaldy. 60 avtordyń úzdik týyndylary engen antologiialar dúniejúziniń 5 qurlyǵyndaǵy 93 memlekettiń iri kitaphanalary men irgeli oqý oryndaryna, mádeniet pen ádebietke mamandanǵan ǵylymi ortalyqtaryna taratylady», - dedi QR Memlekettik hatshysy Qyrymbek Kósherbaev.
«Qundylyqtar almasyp, zamanalar ózgerip jatsa da eshqashan eskirmeitin, óziniń mán-maǵynasyn joǵaltpaityn qasietti uǵymdar men sondai máńgilik taqyryptardy kórkem beineleitin týyndylar bolady. Ondai shyǵarmalar óz dáýiriniń shyndyǵyn sipattap qana qoimai, bolashaq urpaqqa jaqsylyq pen jamandyq, izgilik pen zulymdyq týrasynda tereńinen syr shertedi. Mine, sol sebepti de mundai týyndylar eshqashan ólmeidi jáne olardy ómirge ákelgen avtorlardyń esimderi de eldiń jadynda máńgi saqtalyp qalady. Qazaq degen ult bar jerde bul tabiǵi úderis eshqashan toqtap qalmaq emes. «Halyq – talant qainary» deitin danalyqtyń syry da osynda.
Biz búgin zamanaýi qazaq ádebietiniń baǵyt-baǵdaryn, áleýetin anyq kórsetetin – «Qazirgi qazaq prozasynyń antologiiasy» jáne «Qazirgi qazaq poeziiasynyń antologiiasy» atty kitaptardyń tusaýyn kesip, olarǵa úlken ómirge joldama bermekpiz. QR Tuńǵysh Prezidenti – Elbasy N.Á. Nazarbaevtyń «Bolashaqqa baǵdar – Rýhani jańǵyrý» baǵdarlamasy kópshiliktiń kóńilinen shyqqan, mádenietimizdiń órkendeýine tyń serpin bergen rýhani ómirimizdegi aitýly oqiǵa boldy. Sonyń bir salasy «Jahandaǵy zamanaýi qazaqstandyq mádeniet» jobasy aiasynda jasalǵan bul kitaptarmen tanystyrý elimiz boiynsha Almaty qalasynda alǵash ret uiymdastyrylyp otyr. Bul eńbekterdi – Elbasy ideiasynyń júzege asýy jáne talantty qazaq qalamgerleriniń eren jeńisi dep baǵalasaq oryndy bolmaq», - dedi qala ákimi Baqytjan Saǵyntaev.
Byltyr osy «Qazirgi qazaq prozasynyń antologiiasy» jáne «Qazirgi qazaq poeziiasynyń antologiiasynyń» súiinshi danasy shyǵyp, sheteldik keibir kitaphanalarǵa berildi.
Byltyr sirek týyndy tek sheteldik sanaýly aýditoriiaǵa jetkizilse, búgin 2 jyl boiy atqarylǵan jumys qorytyndylanyp ár antologiia 10 myń danadan basylyp shyqty. Sóitip jalpy sany 120 myń jinaq álemdegi 23 myń kitaphana, ǵylymi ortalyqtarǵa jiberilýge daiyn.
Osylaisha jalpy sany 2 milliard 600 million halyq qazirgi qazaq ádebietiniń jaýharlarymen tanysýǵa múmkindik alady.
Aǵylshyn tilindegi kitaptar - álemniń 17 memleketine, arab tilindegi kitaptar Taiaý Shyǵys pen Afrikadaǵy 22 elge, ispan tilindegi aýdarma - álemniń 20 eline, qytai tilindegi kitaptar 1,5 mlrd halqy bar Qytai aýditoriiasyna, orys tilindegi antologiia 14 elge, frantsýz tilindegi kitaptar Eýropa men Afrikanyń 17 eliniń iri oqý oryndaryna, kitaphanalary men ǵylymi ortalyqtaryna jetkiziledi.
Eske salaiyq, zamanaýi qazaq ádebietiniń úzdik úlgilerin BUU 6 tiline aýdarý jobasy «Jahandaǵy zamanaýi qazaqstandyq mádeniet» jobasy aiasynda júzege asyrylýda.
«Jahandaǵy zamanaýi qazaqstandyq mádeniet» jobasy aiasynda qazirgi qazaq ádebietiniń qos antologiiasy aýdarylyp, jaryq kórdi. Olar – «Qazirgi qazaq prozasynyń antologiiasy» jáne «Qazirgi qazaq poeziiasynyń antologiiasy». Ár antologiianyń kólemi – shamamen 500 bettei, árqaisysyna qazaqstandyq 30 avtordyń tańdamaly shyǵarmalary endi. Kitaptardyń aǵylshyn tilindegi aýdarmasy byltyr 25 qyrkúiek kúni – Britaniiada, ispan tilindegi nusqasy 27 qyrkúiekte – Ispaniiada, orys tilindegi antologiia 15 qazanda Reseide tanystyryldy.
