ەلەمنٸڭ 6 تٸلٸنە اۋدارىلعان قازاق ەدەبيەتٸ انتولوگييالارى 120 مىڭ دانامەن باسىلىپ شىقتى. «جاھانداعى زاماناۋي قازاقستاندىق مەدەنيەت» جوباسى اياسىندا اۋدارىلعان انتولوگييالار ەندٸ شەتەلدەگٸ ٸرٸ كٸتاپحانالارعا تارالاتىن بولادى, دەپ حابارلايدى قازاقپارات.
سالتاناتتى شاراعا قر مەملەكەت حاتشىسى قىرىمبەك كٶشەرباەۆ, قر مەدەنيەت جەنە سپورت مينيسترٸ اقتوتى رايىمقۇلوۆا, الماتى ەكٸمٸ باقىتجان ساعىنتاەۆ قاتىستى.
«بۇل جوبانى ۇيىمداستىرۋ جەنە ٷيلەستٸرۋ جٷيەسٸ دە بۇرىنعىدان ٶزگەشە بولدى. ونداعى باستى ماقسات كٶركەم اۋدارمانىڭ جوعارى ساپاسىن قامتاماسىز ەتۋ بولاتىن. ول ٷشٸن ەڭ الدىمەن جوبانى جٷزەگە اسىرۋعا 6 ەلدەگٸ كٶركەم اۋدارما سالاسىندا تەجٸريبەسٸ مول, بەدەلدٸ دەگەن باسپالار تاڭدالدى. 60 اۆتوردىڭ ٷزدٸك تۋىندىلارى ەنگەن انتولوگييالار دٷنيەجٷزٸنٸڭ 5 قۇرلىعىنداعى 93 مەملەكەتتٸڭ ٸرٸ كٸتاپحانالارى مەن ٸرگەلٸ وقۋ ورىندارىنا, مەدەنيەت پەن ەدەبيەتكە ماماندانعان عىلىمي ورتالىقتارىنا تاراتىلادى», - دەدٸ قر مەملەكەتتٸك حاتشىسى قىرىمبەك كٶشەرباەۆ.
«قۇندىلىقتار الماسىپ, زامانالار ٶزگەرٸپ جاتسا دا ەشقاشان ەسكٸرمەيتٸن, ٶزٸنٸڭ مەن-ماعىناسىن جوعالتپايتىن قاسيەتتٸ ۇعىمدار مەن سونداي مەڭگٸلٸك تاقىرىپتاردى كٶركەم بەينەلەيتٸن تۋىندىلار بولادى. ونداي شىعارمالار ٶز دەۋٸرٸنٸڭ شىندىعىن سيپاتتاپ قانا قويماي, بولاشاق ۇرپاققا جاقسىلىق پەن جاماندىق, ٸزگٸلٸك پەن زۇلىمدىق تۋراسىندا تەرەڭٸنەن سىر شەرتەدٸ. مٸنە, سول سەبەپتٸ دە مۇنداي تۋىندىلار ەشقاشان ٶلمەيدٸ جەنە ولاردى ٶمٸرگە ەكەلگەن اۆتورلاردىڭ ەسٸمدەرٸ دە ەلدٸڭ جادىندا مەڭگٸ ساقتالىپ قالادى. قازاق دەگەن ۇلت بار جەردە بۇل تابيعي ٷدەرٸس ەشقاشان توقتاپ قالماق ەمەس. «حالىق – تالانت قاينارى» دەيتٸن دانالىقتىڭ سىرى دا وسىندا.
بٸز بٷگٸن زاماناۋي قازاق ەدەبيەتٸنٸڭ باعىت-باعدارىن, ەلەۋەتٸن انىق كٶرسەتەتٸن – «قازٸرگٸ قازاق پروزاسىنىڭ انتولوگيياسى» جەنە «قازٸرگٸ قازاق پوەزيياسىنىڭ انتولوگيياسى» اتتى كٸتاپتاردىڭ تۇساۋىن كەسٸپ, ولارعا ٷلكەن ٶمٸرگە جولداما بەرمەكپٸز. قر تۇڭعىش پرەزيدەنتٸ – ەلباسى ن.ە. نازارباەۆتىڭ «بولاشاققا باعدار – رۋحاني جاڭعىرۋ» باعدارلاماسى كٶپشٸلٸكتٸڭ كٶڭٸلٸنەن شىققان, مەدەنيەتٸمٸزدٸڭ ٶركەندەۋٸنە تىڭ سەرپٸن بەرگەن رۋحاني ٶمٸرٸمٸزدەگٸ ايتۋلى وقيعا بولدى. سونىڭ بٸر سالاسى «جاھانداعى زاماناۋي قازاقستاندىق مەدەنيەت» جوباسى اياسىندا جاسالعان بۇل كٸتاپتارمەن تانىستىرۋ ەلٸمٸز بويىنشا الماتى قالاسىندا العاش رەت ۇيىمداستىرىلىپ وتىر. بۇل ەڭبەكتەردٸ – ەلباسى يدەياسىنىڭ جٷزەگە اسۋى جەنە تالانتتى قازاق قالامگەرلەرٸنٸڭ ەرەن جەڭٸسٸ دەپ باعالاساق ورىندى بولماق», - دەدٸ قالا ەكٸمٸ باقىتجان ساعىنتاەۆ.
بىلتىر وسى «قازٸرگٸ قازاق پروزاسىنىڭ انتولوگيياسى» جەنە «قازٸرگٸ قازاق پوەزيياسىنىڭ انتولوگيياسىنىڭ» سٷيٸنشٸ داناسى شىعىپ, شەتەلدٸك كەيبٸر كٸتاپحانالارعا بەرٸلدٸ.
بىلتىر سيرەك تۋىندى تەك شەتەلدٸك ساناۋلى اۋديتوريياعا جەتكٸزٸلسە, بٷگٸن 2 جىل بويى اتقارىلعان جۇمىس قورىتىندىلانىپ ەر انتولوگييا 10 مىڭ دانادان باسىلىپ شىقتى. سٶيتٸپ جالپى سانى 120 مىڭ جيناق ەلەمدەگٸ 23 مىڭ كٸتاپحانا, عىلىمي ورتالىقتارعا جٸبەرٸلۋگە دايىن.
وسىلايشا جالپى سانى 2 ميلليارد 600 ميلليون حالىق قازٸرگٸ قازاق ەدەبيەتٸنٸڭ جاۋھارلارىمەن تانىسۋعا مٷمكٸندٸك الادى.
اعىلشىن تٸلٸندەگٸ كٸتاپتار - ەلەمنٸڭ 17 مەملەكەتٸنە, اراب تٸلٸندەگٸ كٸتاپتار تاياۋ شىعىس پەن افريكاداعى 22 ەلگە, يسپان تٸلٸندەگٸ اۋدارما - ەلەمنٸڭ 20 ەلٸنە, قىتاي تٸلٸندەگٸ كٸتاپتار 1,5 ملرد حالقى بار قىتاي اۋديتوريياسىنا, ورىس تٸلٸندەگٸ انتولوگييا 14 ەلگە, فرانتسۋز تٸلٸندەگٸ كٸتاپتار ەۋروپا مەن افريكانىڭ 17 ەلٸنٸڭ ٸرٸ وقۋ ورىندارىنا, كٸتاپحانالارى مەن عىلىمي ورتالىقتارىنا جەتكٸزٸلەدٸ.
ەسكە سالايىق, زاماناۋي قازاق ەدەبيەتٸنٸڭ ٷزدٸك ٷلگٸلەرٸن بۇۇ 6 تٸلٸنە اۋدارۋ جوباسى «جاھانداعى زاماناۋي قازاقستاندىق مەدەنيەت» جوباسى اياسىندا جٷزەگە اسىرىلۋدا.
«جاھانداعى زاماناۋي قازاقستاندىق مەدەنيەت» جوباسى اياسىندا قازٸرگٸ قازاق ەدەبيەتٸنٸڭ قوس انتولوگيياسى اۋدارىلىپ, جارىق كٶردٸ. ولار – «قازٸرگٸ قازاق پروزاسىنىڭ انتولوگيياسى» جەنە «قازٸرگٸ قازاق پوەزيياسىنىڭ انتولوگيياسى». ەر انتولوگييانىڭ كٶلەمٸ – شامامەن 500 بەتتەي, ەرقايسىسىنا قازاقستاندىق 30 اۆتوردىڭ تاڭدامالى شىعارمالارى ەندٸ. كٸتاپتاردىڭ اعىلشىن تٸلٸندەگٸ اۋدارماسى بىلتىر 25 قىركٷيەك كٷنٸ – بريتانييادا, يسپان تٸلٸندەگٸ نۇسقاسى 27 قىركٷيەكتە – يسپانييادا, ورىس تٸلٸندەگٸ انتولوگييا 15 قازاندا رەسەيدە تانىستىرىلدى.
