«QazAgro» holdinginiń burynǵy basqarýshy direktory A.Qamshymbaev 10 jylǵa sottaldy, dep habarlaidy "Ult aqparat".
«Biylǵy jyldyń 25 jeltoqsanynda Nur-Sultan qalasynyń qylmystyq ister jónindegi mamandandyrylǵan aýdanaralyq sotynyń úkimimen «QazAgro» holdinginiń burynǵy basqarýshy direktory – «Agrarlyq nesie korporatsiiasy» AQ Basqarma múshesi A.A.Qamshymbaev kináli dep tanylyp, oǵan 10 jylǵa bas bostandyǵynan aiyrý jazasy taǵaiyndaldy.
Ol Aqtóbe oblysynda ornalasqan kepil elevatoryn satyp alý kezinde aýyl sharýashylyǵy taýaryn óndirýshige tiesili 200 000 AQSh dollaryn urlaýǵa jáne para berýge itermeleýge árekettengen.
Osy úkimmen Aqtóbe oblystyq máslihatynyń depýtaty A.I.Býlatov aqsha jymqyrýda sybailas dep tanylyp, oǵan 5 jylǵa shartty jaza taǵaiyndaldy.
Sonymen qatar, «Problemalyq kreditter qory» AQ qaryzdardy óndirip alý departamenti direktorynyń orynbasary B.N.Rahimov zańsyz syiaqy alǵany úshin kináli dep tanylyp, 1 jylǵa bas bostandyǵy shekteldi (buryn taǵaiyndalǵan «kúzetpen ustaý» bultartpaý sharasyn eskere otyryp)», - delingen QR Sybailas jemqorlyqqa qarsy is-qimyl agenttiginiń aqparatynda.
Sot úkimi zańdy kúshine engen joq.
