QR Parlamenti Senatynyń depýtaty Dúisenǵazy Mýsin «QazAgro» holdingin saýyqtyrý mańyzdy ekenin aitty, dep habarlaidy "Ult aqparat".
«Agroónerkásip keshenin damytýdyń mańyzdy tetigi – qarjylandyrý máselesinde «QazAgronyń» ózindik orny bar. Máselen, ótken jyly holdingtiń salany qarjylandyrý kólemi 19 paiyzdyq ósimmen 477 mlrd teńgeni quraǵan. Al, bankterdiń úlesi 3,7 paiyz ǵana. Ókinishke qarai, holdingtiń qyrýar qaryz júktemesi bar. Mamandardyń aitýynsha, sondyqtan bul másele nesie mólsherlemelerin tómendetýge múmkindik bermei otyr. «QazAgronyń» qaryzdaryn qarjylyq saýyqtyrý úshin Úkimet tarapynan jan-jaqty negizdelgen jumys qajet dep esepteimiz», - dedi depýtat Senatta agroónerkásiptik keshendi damytý taqyrybyna arnalǵan parlamenttik tyńdaýda.
Onyń paiymynsha, damyǵan elder tájiribesin jáne fermerler usynystaryn eskere otyryp, bankterdiń aýyl sharýashylyǵyn belsendi qarjylandyrý jaiyna nazar aýdarý kerek.
