Foto: «Qazaeronavigatsiia» RMK baspasóz qyzmeti
15 qarasha kúni Almatyda «Qazaeronavigatsiia» RMK Kásibi daiyndaý ortalyǵynda áýe qozǵalysyna qyzmet kórsetý dispetcherlerin daiarlaýǵa arnalǵan jańa oqý-jattyǵý qurylǵysy kesheni iske qosyldy, dep habarlaidy Ult.kz.
AQSh-ta óndirilgen «Air Traffic Simulation and Voice Technologies» jattyǵý keshenin UFA Inc. kompaniiasy «Qazaeronavigatsiia» RMK tapsyrysy boiynsha ázirlegen. Bul keshen bolashaq dispetcherlerdi bastapqy daiarlaýdan ótkizip qana qoimai, jumys istep júrgen mamandardyń kásibi sheberligin arttyrýǵa da múmkindik beredi.
"Buǵan deiin ortalyqta reseilik óndiristegi trenajer qoldanylyp kelgen, ol áli de qoldanysta. Alaida biyl biz álemge tanymal UFA Inc. kompaniiasynyń arnaiy biz úshin ázirlegen zamanaýi amerikalyq trenajerin iske qostyq.
Bul keshen áýe qozǵalysyn basqarýdyń bes negizgi elementin – jerústi qozǵalysyn basqarý, munara, sheńber, jaqyndaý jáne aimaqtyq ortalyq (joǵarǵy áýe keńistigi) – bir tapsyrma aiasynda jumys isteýge múmkindik beredi. Ár maman óz ornynda otyryp, úderisti úzip, talqylap, qaita jalǵastyra alady. Bul – sońǵy tehnologiialardy qoldana otyryp jasalǵan óte zamanaýi trenajer. Osy trenajerdi iske qosý arqyly biz dispetcherlerge mol bilim berý múmkindigine ie boldyq", - deidi «Qazaeronavigatsiia» RMK ortalyǵynyń direktory Nurjan Ahmetov.
Foto: «Qazaeronavigatsiia» RMK baspasóz qyzmeti
Keshenniń tehnikalyq múmkindikteri áýejaidaǵy áýe trafigi men jerdegi qozǵalysty imitatsiialaýǵa arnalǵan. Oqý barysynda jasandy intellekt psevdopilottyń ornyn basyp, radiobailanysty qamtamasyz etedi. Sonymen qatar, keshen virtýaldy shynaiylyq tehnologiiasy arqyly aviadispetcherdiń jumys ornyn barynsha dál beineleidi.
Jańa júiege Qazaqstannyń qoldanystaǵy áýeailaqtary men áýe keńistigin qamtityn aeronavigatsiialyq kartalar júktelgen. Bul jabdyq Qazaqstanda jáne Ortalyq Aziiada teńdesi joq dep tanyldy.
Foto: «Qazaeronavigatsiia» RMK baspasóz qyzmeti
Aita ketsek, Kásibi daiyndaý ortalyǵy – IKAO TRAINAIR PLUS Gold baǵdarlamasynyń tolyqqandy múshesi mártebesin ielengen Qazaqstandaǵy jalǵyz aviatsiialyq oqý orny. Qazir ortalyq Platinum mártebesine qol jetkizýdi jáne Qazaqstan, Ortalyq Aziia men TMD elderiniń aviatsiia salasyndaǵy jetekshi oqý ortalyǵy atanýdy maqsat etip otyr.
Nurjan Ahmetovtyń aitýynsha, qazirgi ýaqytta Kásibi daiarlaý ortalyǵynda 36 joǵary bilikti nusqaýshy jumys isteidi. Olar da álemdik oqý ortalyqtarynda oqyp, áriptestik tájiribe almasady. Biyl ortalyq 20 jyldyǵyn atap ótýde. Osyǵan orai Almatyǵa barlyq halyqaralyq seriktester shaqyrylǵan.
«Qazaeronavigatsiia» Qazaqstannyń áýe keńistiginde aeronavigatsiialyq qyzmet kórsetýdi qamtamasyz etedi. Bul qyzmettiń sapasy men qaýipsizdigin joǵary deńgeide ustap turý úshin bizde áýe qozǵalysyn uiymdastyrý boiynsha myńǵa jýyq qyzmetker, ATSEP injenerlerinen 500-den astam maman jáne meteoqyzmette 350-den astam adam jumys isteidi. Qazirgi ýaqytta biz kadrlardy daiarlaý, izdeý jáne damytý máselelerine erekshe nazar aýdaryp otyrmyz. Osyǵan bailanysty álemniń jetekshi aviatsiialyq oqý ortalyqtarymen, mysaly, Ulybritaniiadaǵy ATS Global, Shvetsiiadaǵy Entry Point North, Frantsiiadaǵy ENAC, Rigadaǵy aeronavigatsiia institýty jáne Chehiiadaǵy aeronavigatsiia institýtymen tyǵyz bailanys ornattyq", - dep atap ótti Nurjan Ahmetov.
2023 jyly Kásibi daiyndaý ortalyǵynda 291 adam osy jattyǵý kesheninde oqýdan ótti. Al biylǵy jyldyń alǵashqy 9 aiynda 192 adam daiyndyqtan ótken. Jańa trenajer ortalyqtyń nusqaýshylaryna bolashaq jáne qazirgi dispetcherlerdi eki ese kóp oqytýǵa múmkindik beredi.
