Arystaǵy jarylys kezinde áleýmettik jelilerge jalǵan aqparat taratqan azamattyń ústinen qylmystyq is qozǵaldy. Bul týraly oblystyq Politsiia departamentiniń baspasóz qyzmetinen málim etti, dep habarlaidy "Ult aqparat".
«Arystaǵy joiqyn jarylys kezinde áleýmettik jeli arqyly túrli aqparattar, sonyń ishinde eldi dúrliktirgen habarlamalar WhatsApp pen messendjerler arqyly keńinen taralyp, halyq arasynda biraz shý týdyrdy. Osyǵan bailanysty Túrkistan oblysy Politsiia departamentiniń politseileri jedel áreket etip, jalǵan aqparat tartýshylardy izdestirý jumystaryn kúsheitti. Nátijesinde, jalǵan aqparat taratý arqyly zańǵa qaishy is-áreket jasaǵan kúdikti azamat ustaldy. Ol óziniń oilanbastan jasaǵan is-áreketine ókinip, barsha halyqtan keshirim surady. Atalmysh kúdiktige bailanysty Arys APB qyzmetkerleri QR Qylmystyq kodeksiniń 274-babymen («Kórineý jalǵan aqparat taratý») sotqa deiingi tergep-tekserý amaldaryn júrgizýde», - delingen habarlamada.
Aita keteiik, Arys qalasynyń turǵyny Almashan Sheripov áleýmettik jelilerge taraǵan videoda jarylystan birneshe júzdegen adamnyń kóz jumǵany týraly aitqan bolatyn.
Al Túrkistan oblystyq Politsiia departamenti taratqan videoda ol jalǵan sóilegeni úshin ókinetinin jetkizdi.
«2019 jyldyń 26 maýsymynda Arys qalasyndaǵy jarylystan 150-200 áskeri, 100 qarapaiym halyq mert boldy dep jalǵan aqparat taratqanym úshin Qazaqstan aldynda, búkil halyq aldynda, Arys qalasynyń halqy aldynda keshirim suraimyn. Qazaqstan halqyn, elimizdi sebepten-sebepsiz dúrliktirgenim úshin is-áreketime keshirim suraimyn», - deidi videoda Almashan Sheripov.
