Elordada IX Azamattyq forým aiasynda Donorlar forýmy bastaldy, dep habarlaidy QazAqparat.
Donorlar forýmynyń missiiasy – elde donorlyq jáne qaiyrymdylyq qyzmetti júzege asyrý úshin qolaily orta qurýǵa járdemdesý, azamattyq qoǵamnyń áleýetin damytý.
«Qazir biz úkimettik emes uiymdardyń qyzyǵýshylyǵyn týdyratyn ózekti jobalar men tásilderdi qalyptastyrý máselelerin talqylaýdy kózdep otyrmyz. Sondai-aq donorlardyń maqsattary men demeýshiligi boiynsha ne kútetinin bilgimiz keledi. Eń negizgi mindet – biryńǵai tásilderdi ázirleý jáne osy saladaǵy qyzmettiń belgili bir deńgeide ashyqtyǵyn qamtamasyz etý, óitkeni qazir áleýmettik jobalardy biýdjettik qarjylandyrýdan basqa, azamattyq bastamalardy qoldaý boiynsha iri kásiporyndardyń, biznes-qoǵamdastyqtardyń, halyqaralyq ÚEU-nyń úlken tolqynyn kórip otyrmyz. Bul baǵytta barlyq toptyń teńdei qatysýyn qamtamasyz etý úshin osyndai forýmdar qajet. Bul jiyn eń aldymen demeýshilerdiń ne kútip otyrǵanyn jáne ÚEU-lardyń tájiribesin aitýǵa, jańa tásilder shyǵarýǵa kómektesedi», - dedi QR Aqparat jáne qoǵamdyq damý ministrligi Azamattyq qoǵam isteri komitetiniń tóraǵasy Madiiar Qojahmet Qazmedia ortalyǵynda tilshilerge bergen suhbatynda.
Sonymen birge, komitet basshysy biylǵy pandemiiada donorlyq jumystyń jarqyn mysaly kórsetilgenin atap ótti.
«2020 jyldy jarqyn mysal retinde erekshe aitýǵa bolady. Pandemiia kezinde «Birgemiz» qorynan bastap, kóptegen ÚEU-lar men iri biznester azyq-túlik paketinen bastap túrli kómek retinde millionnan astam halyqqa kómek kórsetti. 30 qyrkúiekte Memleket basshysy qaiyrymdylyq uiymdarynyń basshylarymen kezdesý ótkizdi jáne birqatar tapsyrma berdi. Osy bastamalar aiasynda «Qaiyrymdylyq týraly zańǵa» ózgerister men tolyqtyrýlar engizýdi talqylap jatyrmyz. Dálirek aitqanda, salyqtyq jeńildikter berip, qaiyrymdylyq uiymdarynyń biryńǵai bazasyn jasaý josparlanǵan», - dep túsindirdi M. Qojahmet.
Sóz sońynda spiker elimizdegi donorlyq mádeniettiń qalyptasýy týraly pikir bildirdi.
«Bizdegi donorlyq mádeniet týraly aitar bolsam, eki másele eriksiz qozǵalady. Onyń birinshisi — halyqtyń 90 paiyzy mundai qaiyrymdy iske jaqyn. Meshitterde, jekelegen oryndarda qaiyrymdylyq isteri jii kórinis taýyp jatady. Al ekinshi jaǵynan úlken uiymdar arqyly jasalyp jatqan donorlyq qyzmet áli dami qoiǵan joq. Eń bastysy halyqtyń donorlyqqa degen kózqarasy, nieti túzý. Al ony bir izge túsirip, álsiz tustaryn jetildirip, ortaq standarttarǵa qoiý bizdiń basty maqsatymyz bolyp otyr. Forým barysynda osy máselelerdi jan-jaqty talqylaityn bolamyz», — deidi ol.
Aita keteiik, forýmdy QR Aqparat jáne qoǵamdyq damý ministrliginiń qoldaýymen Azamattyq bastamalardy qoldaý ortalyǵy uiymdastyrǵan.
Forým qorytyndysy boiynsha Qazaqstannyń IX Azamattyq forýmynyń qarar jobasyna usynystar men usynymdar ázirlenetin bolady.
