«Qaiyrymdy ister marafony» jalpyhalyqtyq sipat alǵan úlgili is-shara boldy. Bul týraly «Jomart júrek» syilyǵy laýreattaryn marapattaý saltanatty sharasynda QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«Jyl basynda Táýelsizdiktiń 30-jyldyǵyn merekeleý maýsymyn ashyp bergen jalpyulttyq «Qaiyrymdy ister marafony» búgin óz máresine jetti. Ózderińiz bilesizder, bul bastama – el Prezidentiniń usynysymen jalpyhalyqtyq sipat alǵan úlken de úlgili is-shara boldy. Sondyqtan da, búgin Memleket basshysy osy bastamaǵa atsalysqan barsha azamattarǵa óziniń ystyq lebizin joldady», - dep atap ótti ministr.
Aida Balaeva el Prezidenti osy «Qaiyrymdy ister marafony» aiasynda muqtajdarǵa kómek qolyn sozyp, ainalasyn jaqsylyqqa bólegen jomart jandardy erekshe atap ótkendigin aitty.
«Ol da bolsa, halqymyzdyń ejelden «qaiyrly is jasaýdy» izgiliktiń belgisine balap, ishki bereke-birlikti biik qoiǵan danalyǵy. Joba bastalǵannan biznes qaýymdastyq, azamattyq sektor, jekelegen belsendi azamattar tarapynan qoldaý taýyp, barlyq óńirde jaqsylyq jasaýǵa shaqyrǵan is-sharalar uiymdastyryldy. Munyń ózi - qoǵamnyń áleýmettik-mańyzdy máselelerin sheshýde memleket pen jeke sektordyń ózara áriptestikte, birigip áreket ete alatynynyń dáleli»,- dedi ol.
