Qazir elordada «Qairat» fýtbol klýbynyń quramy jattyǵý ótkizip jatyr. Erteń atalǵan komanda qostanailyq «Tobyl» fýtbol komandasymen Qazaqstannyń sýperkýbogy úshin talasqa túsedi, dep habarlaidy QazAqparat.
«Sport boiynsha ótetin kez kelgen jarys nemese kýbok óte mańyzdy. Jáne ár saiystyń óz deńgeii bar. Bizdiń komanda el kýbogy bolsyn, sýperkýbok bolsyn jaýapkershilikpen qaraidy. Ár jarys - fýtbol komandalary úshin jańa múmkindik. Qarsylasymyz «Tobyl» komandasy jeke quramyn aitarlyqtai jasaqtady. Erteń jaqsy bir oiyn bolaiyn dep tur», - dedi «Qairat» fýtbol komandasynyń bas bapkeri Qurban Berdiev «Astana Arena» kesheninde ótken baspasóz máslihatynda.
Bas bapkerdiń aitýynsha, jarysta nátijemen qatar, jankúierler úshin áserli oiyn kórsete bilý de mańyzdy.
«Erteńgi oiynǵa kelsek, erteń - final. Aldyn ala boljam jasai almaimyn. Ózderińiz bilesizder, sportta bári múmkin. Álsiz degen komanda aiaq astynan jeńiske jetip jatady. Otandyq jáne sheteldik sportta ondai mysaldar kóp. Bul jerde 2 komandanyń da múmkindigi teń. Bizdiń maqsat – nátijeli oiyn kórsetý», - deidi ol.
Qazir «Qairat» fýtbol klýbynyń oiynshylary elordadaǵy «Astana Arena» sport kesheninde jattyǵý ótkizip jatyr.
Aita keteiik, erteń «Qairat» jáne «Tobyl» fýtbol komandasy Qazaqstannyń sýperkýbogy úshin baq synasady.
Fýtbol oiyny «Astana Arena» sport kesheninde keshki saǵat 19:30-da bastalady.
