Qairat TÚNTEKOV «SuperStar KZ» tele baiqaýy arqyly sahnaǵa kóterilip, tyńdarmanyn tapqan talant. Belgili sebepterge bailanysty ónerli jigittiń biraz ýaqyt sahnadan alshaqtap qalǵany bar. Elimizde uiymdastyrylǵan «I m Singer» jobasy Qairattyń qaita sahnaǵa oralýyna uiytqy boldy. Jýyrda el arasynda «Qairat elden ketedi» degen áńgime tarady. Tyńdarman kóńilin kúpti etken máseleniń mán-jaiyn ánshi jigittiń ózinen surap bildik.
- «I m Singer» jobasynyń júldegeri atanǵan soń, Qairattyń shyǵarmashylyqta joly qaita ashylǵan siiaqty ǵoi. Halyqtyń qoshemetin saǵyndyńyz ba, shynyńyzdy aityńyzshy?
- Árine, nieti túzý pendege jaratqan ózi jol silteidi degendi aitady ǵoi, biletinder. Osy jobaǵa qatysyp, júldege qol jetkizgenim birinshi - Allanyń, ekinshi - halyqtyń qoldaýynyń arqasy dep bilem. Álemdik deńgeide ánshi bolyp, elimizdiń atyn asqaqtatý bala kúngi armanym edi. Buiyrsa, úmitimdi úkilep osy maqsattyń jolynda jan-tánimmen eńbek etýge tyrysamyn. Osy jyly jeke shoý kontsertimdi bersem degen josparym bar.
Biraq myna aida, myna kúni ótkizemin dep, tap basyp aita almaimyn. Oǵan deiin biraz ánder jazyp, beinebaiandar túsirip, qyrýar eńbek etýge týra keledi. Ózińiz aitqandai, halyqtyń qoshemetin saǵynǵanym ras. Er jigittiń basynan ne ótpeidi deisiz?! Ómirde jyǵylmaǵan myqty emes, jyǵylyp qaita júgirgen myqty demei me? Jorytqanda jolymnyń bolyp, baiqaýda baǵymnyń janýyna uiytqy bolǵan tyńdarmandaryma sheksiz alǵysymdy bildiremin.
- Qairattyń elden ketýi múmkin degen tyńdarman alańdaýshylyǵy bar kórinedi. Ózińiz ne aitasyz?
- Árine, maǵan kórshi elderden túrli usynystar túsip jatqany ras. Reseilik prodiýser Maksim Fadeev te birigip jumys jasaǵysy keletinin jetkizdi. Biraq meniń tańdaýym Qytai eline tústi. Bul jóninde arnaiy kelisim shart ta jasasyp qoidyq. Alla qalasa, ata-anamnyń batasyn alyp, sol jaqqa attanamyn.
Qytaidy tańdaǵan sebebim, bul óte alyp memleket. Halqynyń sany da aitarlyqtai kóp. Sol kópti ónerimmen moiyndata alsam, ary qarai Amerika asyp ketýim de múmkin. Nege deseńiz, moiyndaý kerek bizdiń elde shoý-biznes joq. Toi-biznes qana myǵym damyǵan. Óitkeni ónerpaz ataýlynyń barlyǵy halyqtyń toiynyń arqasynda nápaqasyn aiyryp júr. Al men shoýdy tańdaimyn. Sol sebepti kisi eline ketip bara jatqan jaiym bar. Bul týǵan jerimnen jerigendiktiń belgisi emes. Men týǵan jerimniń árbir tasyn, aqqan sýyn, atqan tańyn erekshe súiemin. Maqsatym qazaq degen uly halyqtyń óner men mádenietten kende emestigin ózgelelerge moiyndatý.
- Bizde týma talanttar baǵalanbaityny jasyryn emes. Aziiany qoiyp, Eýropany moiyndatqan Dimash Qudaibergenniń eldegi biraz jobalarda baǵy janbai, saly sýǵa ketken bolatyn. Munyń bárine óner sahnasynda jeń ushynan jalǵasqan tamyr-tanystyq pen jemqorlyq kináli me, álde telearnalardyń qulaǵyn ustaǵan shala saýatty sheneýnikter kináli me?
- Onyńyz ras. Kezinde mýzykanyń jilik maiyn shaǵa almai júrip, án baiqaýlarǵa qazylyq etkender «aiǵailaisyń, shyńǵyrasyń, án aita almais yń» degendi aityp, Dimashty tuqyrtqan edi. Biraq óner jolynda júreginde imany bar jandar kezdesip, solardyń qolpashtaýynyń arqasynda kúlli álemdi moiyndatty.
Bizdiń elde sen myń jerden týma talant bolsań da elemeidi. Kimniń aqshasy kóp, sonyń soiylyn soǵady. Úlken shoý kontsertter óte az uiymdastyrylady. Oǵan mádeniet pen órkeniettiń qulaǵyn ustaǵan sheneýnikter qarjy salǵysy kelmeidi. Burynǵylar «Bulaq kórseń kózin ash» deýshi edi. Myna balanyń baǵy janaiyn dep tur eken, demep jibereiik degen nyspy joq. Ánshilerdiń barlyǵy toi jaǵalap, jan baǵý qamymen júr. Mynadai jaǵdaida bizde jaqyn arada shoý-biznes damymaidy. Biraq bizde talanttar óte kóp. Barlyǵy qolda bar da altynnyń qadiri joqtyqtyń qurbany bolyp júr. Osylai jalǵasa berse, el damýyna úles qosatyn talanttardyń barlyǵy jan-jaqqa josyp kete barady. Meniń janymdy jegidei jeitini osy másele.
- Isti bolǵannan keiin tyńdarman biraz ýaqyt ózińizdi sahnadan joǵaltyp aldy. Jeke kásippen ainalysyp, qaryzymdy ótep aiaqqa turyp alaiyn dedińiz be?
- Ótken máseleni qaita qaýzaǵym kelmeidi. Biraq suraqtan jaltarý ádepke jatpas. Shynymdy aitsam, eshqandai kásippen ainalyspadym. Depressiiada júrdim. Sol sebepti jýrnalisterdiń de kózine túskim kelmedi. Tek sportpen ainalysýdy qolǵa aldym. Dene bitimimdi qalypqa keltireiin, densaýlyǵyma septigi tier dedim. Bárine ýaqyt emshi ǵoi. Óz ózime kelgen soń baryp, jańa qarqynmen, jańa josparmen óner jolyna qaita aiaq bastym.
- Bir kezderi Qairatty qaralaǵandardyń ishinde prodiýser bolýǵa usynys tastap jatqandar bar bolar. Qazir qai prodiýsermen jumys istep jatyrsyz?
- Usynystar bar. Biraq shetelge ketip bara jatqannan keiin álbette sol jaqtyń prodiýserlerimen jumys jasaýǵa týra keledi. Buǵan deiin eldegi biraz prodiýserler men qoian qoltyq aralasyp, qyzmet jasadym. Basyma kún týǵanda teris ainalǵandary da boldy. «Bar bolsań kóre almaidy, joq bolsań bere almaidy» degen ataly sóz bar ǵoi. Bar yntam ózimniń aiaqtan turyp ketetindigimdi tyńdarmanǵa dáleldeý boldy. Tilegim oryndalyp, kóptiń demeýimen sahnaǵa qaita kóterildim. Endigi maqsatym - osy biigimnen qulamaý.
- Bizdiń óner sahnasynda qaltań qalyń bolmasa qaryshtaýyń qiyn. Qairattyń án áleminde qalyqtaýyna qol ushyn beremin dep jatqan aǵalary bar ma eken. Álde ata-anańyz ben etjaqyndaryńyzǵa úmit artýǵa týra kelip otyr ma?
- Maǵan tileýles bolyp turǵan áýeli Alla, odan keiin ózimniń atan-anam men jaqyndarym.. Odan ózge qol ushyn berem dep niet bildirgen adamdy kórip turǵanym joq. Qazirgi adamdardyń bergen qoly alsam dep turatyn boldy ǵoi. Eger sahnaǵa shyǵyp atyń asqaqtap tursa, birdeńe berýi múmkin. Óitkeni qalaida bir qaitymy bolatynyn biledi. Al ázirge óziń de joq bolsa, bere almaidynyń kebi bolyp tur. Áitse de qiyn qystaý kezde máselemdi sheship bergen birdi-ekili aǵalarym boldy. Atyn aitpasam da sol kisilerge ishtei rizashylyǵymdy bildiremin.
- Osyndai qara basyn oilap ketken qoǵamdaǵy qandai másele sizdi alańdatady?
- Meni alańdatatyny - halyqtyń qymbatshylyq qamytyn kiip otyrǵany. Otbasyndaǵy tabystyń jetispeýshiligi men áleýmettik teńsizdiktiń saldarynan kóptegen jas otbasylar ajyrasyp ketip jatyr. «Aýrýyn jasyrǵan óledi» degen. Jaramyzdy qansha jasyryp baqsaq ta, anyǵy sol - bizdiń elde kedeiler kóp. Mendeleevtiń kestesine engen bar bailyqtyń ústinde otyrmyz. Biraq, qaiyrshymyz. Kóp balaly otbasylardyń jai-kúiin estigende janym aýyrady. Qaisybirin aitamyz. Júrekti syzdatyp, jandy aýyrtatyn mundai jaǵdailar bizdiń elde jetip artylady.
- Kóptegen jas ónerpaz jigitter saiasatta synalyp kórýge umtylady. Máselen, «91» tobynyń múshesi Dýlat MUHAMETQALI jýyrda «Jas otan» ortalyq keńesiniń sailaýyna qatysýǵa ózin usynypty. Búgingi jaǵdaida ónerdegi jastarǵa saiasatpen ainalysýdyń ózgege de, ózine de tier septigi bar dep oilaisyz ba?
- Bul aqpardy estidim. Ónerdegi jastardyń saiasatqa erte aralasqanyn óz basym quptamaimyn. Jastyq shaqta qyzý jumys jasap, ózin jan-jaqty damytqan durys pa deimin. Meniń oiymsha qyryqtyń qyrqasyna shyqqan soń baryp, úlken qyzmetke barýǵa bolady. Sebebi ózińniń bilgen túigeniń qarai, aitaryń da, atqarar iske ebiń de bolady.
Al ózińdi tanyp bilmei, óz jolyńdy qalyptastyrmai jatyp ózgeniń máselesin sheshý qiyn. Árine jastar jańa zamannyń jarshysy dep jatady. Jas bolsa da saiasatqa aralasýǵa beiim adamdar bolady. Al, óner adamyna saiasatpen ainalysý ońai sharýa emes. Odansha ýaqytty ozdyrmai ónerińdi damytqan durys pa deimin.
Dinar Qamilqyzy
