Astana qalasynyń Baiqońyr aýdany №2 sotynyń sýdiasy Nurlan Baiahmetov Nursultan Nazarbaevtyń nemere inisi Qairat Satybaldyulynyń isi boiynsha úkim shyǵardy, dep habarlaidy "Ult aqparat".
Buǵan deiin aiyptalýshy tarap pen jábirlenýshi tarap sanalatyn kompaniialardyń kelisimge kelgeni habarlanǵan bolatyn. Sottalýshylar Satybaldyuly, Qońyrbaev, Beketov, Muhametjanuly, Mýravev tatýlasý týraly mediatsiialyq kelisimdi rastap, bári de aiyppen kelisetinin aitqan.
Prokýror Esebaev sottan Qairat Satybaldyulyn 6 jylǵa bas bostandyǵynan aiyrýdy, memlekettik qyzmette, sotta, Ulttyq bankte, memlekettiń úlesi 50 paiyzdyq kásiporyndarda 10 jyl jumys isteý quqyǵynan aiyrýdy, múlkin tárkileýdi suraǵan. Sondai-aq, sottalýshy jazasyn qaýipsizdigi ortasha túzetý mekemesinde óteýi kerektigin aitty.
"Satybaldyuly 28-baptyń 3-bóligi, 189-baptyń 4-bóligi 2-tarmaǵy, 195-baptyń 4-bóligi 2-tarmaǵy boiynsha kináli dep tanylsyn. Múlki tárkilenip, memlekettik qyzmette laýazym atqarý quqyǵynan 10 jyl merzimge aiyryla otyryp, alty jylǵa bas bostandyǵynan aiyrý jazasy taǵaiyndalsyn", - dedi úkimdi oqyǵan Nurlan Baiahmetov.
Ol jazasyn qaýipsizdigi ortasha mekemede óteidi. Naýryzdan beri izoliatorda otyrǵan 1 kúni koloniiadaǵy 1,5 kún retinde esepteledi.
"Sonymen qatar Prezidentke Satybaldyulynyń ulttyq qaýipsizdik organynyń general-maior sheni men "Qurmet", "Parasat" ordenderinen aiyrý týraly úsynys engizilsin", - dedi sýdia.
Aita ketsek, eki kún buryn bastalǵan sotta advokat Qairat Satybaldyuly kinásin moiyndaitynyn, eki kompaniianyń 12 mlrd teńge jáne 28 mlrd teńge shyǵynyn ótegenin málim etken. Protsess eki is boiynsha qaralǵan bolatyn.
Eske sala ketsek, Qazaqstannyń burynǵy prezidenti Nursultan Nazarbaevtyń nemere inisi osy jyldyń naýryzynda qamaýǵa alynǵan edi. Onyń ústinen «aldaý jolymen múliktik zalal keltirdi», «senip tapsyrylǵan bóten múlikti iemdenip alý nemese talan-tarajǵa saldy» degen aiyppen qylmystyq is qozǵalǵan. Odan bólek ol «salyqtan jáne kedendik tólemderden jaltardy», «qylmystyq jolmen tapqan tabysyn zańdastyrdy» degen kúdikpen de tergelgen.
Sonymen qatar naýryzda áieli Gúlmira Satybaldy da «biznesti reiderlik jolmen tartyp aldy» degen aiyppen qamaýǵa alynǵan.
Al Qairat Satybaldyulynyń inisi Samat Ábish Qańtar qyrǵynynan keiin UQK tóraǵasynyń orynbasary qyzmetinen bosatylǵan. UQK Samat Ábish «tergeý nazarynda» ekenin málimdegen. Alaida onyń qandai da iske qatysy bar-joǵy aitylǵan joq. Qairat Satybaldyuly «Qazaqtelekomnan» 12,7 mlrd teńge, «Kólik servisi ortalyǵynan» 28,6 mlrd teńge jymqyrǵan dep aiyptalǵan.
