Pandemiia kezinde memlekettik júie úshin saiasi sheshimdi shuǵyl qabyldaý – úlken synǵa ainaldy. Strategiialyq josparlaý jáne reformalar agenttiginiń tóraǵasy Qairat Kelimbetov Reformalar jónindegi Joǵary keńestiń úshinshi otyrysy jóninde osyndai pikir bildirdi, dep habarlaidy QazAqparat.
«Pandemiia ekonomikaǵa qos taraptan salqynyn tigizdi. Bir jaǵynan jahandyq ekonomikanyń qarqyny báseńdedi. 2020 jyly qatelespesem álemdik jalpy ishki ónim 4 paiyzǵa tómendedi. Ekinshi jaǵynan shekteý sharalary memleketterdiń biýdjetine, kirisiniń azaiyp, shyǵysynyń ulǵaiýyna áser etti. Pandemiia sonymen qatar densaýlyq saqtaý jáne bilim berý júiesin stress-testten ótkizgenin bilesizder. Osynyń bári Qazaqstan Úkimetine daǵdarysqa qarsy tiisti sharalardy engizýge májbúr etti», - dedi Qairat Kelimbetov sarapshy Rahym Oshaqbaevpen «Habar 24» arnasynda júrgizgen suhbatynda.
Onyń aitýynsha, Úkimet daǵdarysqa qarsy sharalardyń basym bóligin densaýlyq saqtaý júiesine baǵyttady. Ekinshi jaǵynan kásipkerlik salasyna orasan zor qoldaý qajet boldy. Sebebi ártúrli sebepke bailanysty biraz adam turaqty tabysynan aiyryldy.
«Memleket bul turǵyda kásipkerlerge kómektesti. Mysal retinde aitarym: 4,5 millionnan astam adamǵa aiyna 42 500 teńgelik áleýmettik tólemdi berý úshin 450 mlrd teńge jumsaldy. Mundai kómekti postkeńestik elderdiń ishinde halqyna Qazaqstan ǵana kórsetkenin atap ótý kerek. Osynyń bári de keiingi 30 jyldyń ishinde jolǵa qoiylǵan ekonomikalyq saiasattyń arqasynda múmkin boldy. Tuńǵysh Prezident – Elbasy bastaǵan reformalardyń arqasynda arqasúier qor qalyptasqanyn Prezident te óz Joldaýynda atap ótti», - dedi ol.
Degenmen Qairat Kelimbetov pandemiianyń syn-tegeýrinderine tolyqqandy jaýapty osy sharalarmen ǵana berý kúrdelirek ekenin atap ótti.
«Jahandyq trendter qatty ózgeriske ushyraýda. Pandemiianyń yqpaly men shekaralardyń jabylýy, ekonomikalyq ósim qarqynynyń tómendeýi – biýdjetke de, Úkimettiń múmkindikterine de aýyr júkteme túsirdi. Sol sebepti Memleket basshysy bilik tutas árekettese otyryp, qandai da bir zańnamalyq óte shuǵyl sheshimderdi qabyldaityn, jedel qarajat bóle alatyn jańa institýttyń kerektigi jóninde toqtamǵa keldi. Onyń basynda Reformalar jónindegi Joǵary keńes turady. Onyń quramynda Úkimettiń, «Atameken» palatasynyń, Prezident Ákimshiliginiń ókilderi bar. Olar óte mańyzdy saiasi sheshimderdi qabyldai alady. Bul sheshimderdi Memleket basshysy bekitedi. Memlekettik júie úshin saiasi sheshimdi shuǵyl qabyldaý – erekshe syn-tegeýrin boldy. Sheshimdi qabyldaýmen qatar sol reformalardyń Parlamentte jedel júrýin qadaǵalaityn osyndai institýt kerek boldy», - dedi ol.
Eske sala ketsek, búgin Aqordada Memleket basshysy Qasym-Jomart Toqaevtyń tóraǵalyǵymen Reformalar jónindegi Joǵary keńestiń úshinshi otyrysy ótken bolatyn. Jiynda Qazaqstan Respýblikasynyń 2025 jylǵa deiingi ulttyq damý josparyn ázirleý, Memlekettik josparlaýdyń jańa júiesi, Memlekettik basqarýdy damytýdyń 2030 jylǵa deiingi tujyrymdamasy, 2021-2025 jyldarǵa arnalǵan jekeshelendirý josparynyń jobasy, sondai-aq, Jedel reformalar paketi jáne ulttyq halyq sanaǵyn ótkizý máseleleri qarastyryldy. Otyrysta Prezident memlekettik basqarýdy damytý úshin is-qimyldar josparyn qabyldaýdy tapsyrdy.
