Belgili kásipker Qairat Boranbaev qamaýǵa alyndy, dep habarlaidy "Ult aqparat" Qarjy monitoringi agenttiginiń baspasóz qyzmetine silteme jasap.
"Qarjy monitoringi agenttigi kvazimemlekettik sektordaǵy asa iri kólemdegi qarajatty jymqyrý faktisi boiynsha qylmystyq isti tergep jatyr. Osy qylmysty jasady degen kúdikpen Qairat Boranbaev ustalyp, ýaqytsha ustaý izoliatoryna qamaldy", - delingen habarlamada.
17 naýryzda sot 2 ai merzimge qamaýǵa alý túrindegi bultartpaý sharasyna sanktsiia berdi. Tergeý jalǵasyp jatyr.
Qylmystyq-protsestik kodekstiń 201-babyna sáikes, tergeý múddesi úshin ózge málimetter jariialanbaidy.
Qairat Boranbaev - eldiń eks-prezidenti Nazarbaevtyń qyzy Dariǵa Nazarbaevanyń burynǵy qudasy. Boranbaevtyń qyzy Alima Boranbaeva Dariǵanyń uly Aisultan Nazarbaevqa (2020 jyly qaitys bolǵan) turmysqa shyqqan. Keiin Aisultan men Alima ajyrasyp ketken.
Boranbaev Forbes Kazakhstan reitingi boiynsha, Qazaqstandaǵy eń bai elý biznesmenniń qataryna kiredi. Bailyǵy – 519 million dollar. Ol 2000-2002 jyldary "QazTransGaz" kompaniiasynyń atqarýshy direktory jáne "Intergas Central Asia" kommertsiialyq direktory, 2006-2014 jyldary "QazRosGaz" kompaniiasynyń bas direktory boldy.
Ol – Almatynyń "Qairat" fýtbol komandasynyń iesi. Fitnation fitnes klýbynyń, "Rahat Palas", Comfort Hotel Astana qonaq úileriniń iesi, Esentai Mall, Esentai Tower biznes ortalyǵyn, "Almaly" saýda ortalyǵyn, Latviiadaǵy Jurmala Golf Club & Hotel qonaqúiin seriktesimen bólisip basqarady. McDonalds tamaqtaný ornynyń Qazaqstandaǵy jáne Reseidegi franchaizing iesi.
Onyń Britaniia, Chehiia, Reseide qymbat úileri bary da belgili bolǵan.
Boranbaev Qaraǵandydaǵy farmatsevtikalyq keshenin de baqylaidy. Qazaqstan biligi "Spýtnik V" ekpesin Qaraǵandy farmkesheninde shyǵarý úshin 15 milliard 175 myń teńge bólgen.
