Foto: ©️ Tengrinews.kz / Turar Qazanǵapov
Alty jylǵa sottalyp, keiin jazasy jeńildetilgen Qairat Boranbaev búgin bostandyqqa shyqty. Bul týraly IIM Qylmystyq-atqarý júiesi komitetiniń baspasóz qyzmeti habarlady.
"Bas bostandyǵynan aiyrý jazasynyń ótelmegen bóligi bas bostandyǵyn shekteý túrindegi jazaǵa aýystyrylǵan sottalýshy Qairat Boranbaev 6 qarashada bas bostandyǵynan aiyrý ornynan bosatyldy jáne turǵylyqty jeri boiynsha jazasyn óteý ornyna jiberildi.
Mekeme ákimshiligi sottalýshyǵa tirkeý úshin probatsiia qyzmetine kelý baǵyty men ýaqytyn kórsete otyryp, jazasyn óteý ornyna ketýge uiǵarym beredi, sondai-aq ony sipattaityn materialdardy probatsiia qyzmetine jiberedi", - delingen habarlamada.
Aita keteiik, buǵan deiin Aqmola oblysynyń soty 6 jylǵa bas bostandyǵynan aiyrylǵan Qairat Boranbavtyń jazasyn jeńildetip, bas bostandyǵyn shekteý jazasyn taǵaiyndaǵan edi.
Úkimdi aýystyrý kezinde kelesi mán-jailar eskerildi:
• sottalǵan adam jaza merziminiń 1/3 bóligin (2 jyl 4 ai 5 kún) ótedi;
• memleketke keltirilgen zalaldy tolyǵymen ótep, tergeýge kómektesti jáne isine ókinedi;
• qamaýda ustaý kezinde oǵan oń sipattama berildi.
Eske sala keteiik, Qairat Boranbaev 2022 jyly naýryzda qamaýǵa alyndy. Ol kvazimemlekettik sektorda asa iri mólsherde qarajat jymqyrdy degen kúdikke ilingen.
Buǵan deiin Qarjylyq monitoring agenttigi Qairat Boranbaev óz erkimen memleketke 90 mlrd teńgeniń aktivterin qaitarǵanyn málimdedi. Olardyń arasynda munai ken orny, gaz taratý kompaniiasy, qonaq úi jáne saýda oiyn-saýyq keshenderi bar.
Sodan soń Qairat Boranbaevtyń memleketke keńse úi-jailaryn, saýda-oiyn-saýyq keshenin jáne dene shynyqtyrý-saýyqtyrý jelisin qaitarǵany habarlandy. Onyń ishinde quny 33,75 mlrd teńge bolatyn nysandar bar.
Sonymen qatar oligarh taý ken orny men gaz taratý kompaniialaryn memleketke qaitardy. Odan bólek quny 14 mlrd teńge bolatyn gaz taratý kompaniiasy da memleket menshigine ótti. Astananyń sol jaǵalaýyndaǵy qonaq úiin óz erkimen memleketke berdi.
Boranbaev – iri kásipker, Qazaqstandaǵy, Belarýstegi jáne Reseidiń birneshe óńirindegi McDonald's jyldam tamaqtaný jelisiniń jáne taǵy basqa iri kompaniialardyń iesi. Onyń qyzy Álima 2020 jyly jazda Nursultan Nazarbaevtyń qaitys bolǵan jieni Aisultanǵa turmysqa shyqqan.
