Foto: prosports.kz
Astana qalalyq soty oligarh Qairat Boranbaevqa jáne qylmystyq istiń basqa da qatysýshylaryna úkim shyǵardy, - dep habarlaidy "Ult aqparat" Astana sottarynyń resmi paraqshasyna silteme jasap.
"Astana qalalyq soty kináni moiyndaý týraly mámile nysanyndaǵy protsestik kelisimmen birge kelip túsken Qairat Boranbaevqa jáne basqalarǵa qatysty qylmystyq isti qarady.
Kelisý isin júrgizý barysynda Qairat Boranbaev, Roman Nahanov i Tair Januzaq protsestik kelisimdi óz erikterimen jasasqandaryn, kináni moiyndaityndaryn, is boiynsha aiyptaý men dáleldemeler, keltirilgen ziiannyń sipaty men mólsheri týraly daýlaspaityndaryn rastady.
Jábirlenýshi «QazagGaz» UK» AQ ókili 14 mlrd. teńgeden astam zalaldyń tolyq ótelgenin atap ótti" - delingen habarlamada.
Sot baspasóz qyzmetiniń málimetinshe, protsestik kelisim jasasý tártibi saqtalǵan jáne ol zań talaptaryna sáikes keledi. Árkimniń qylmystyq róli eskerile otyryp, Q. Boranbaev jáne R. Nahanov urlanǵan aqshaǵa ielik etip zańdastyrǵan, al T. Januzaq basshylyqtyń zańsyz nusqaýlaryn oryndaǵan. Ol osy oraida qylmystyq jolmen tabys tappaǵan.
Sotta prokýror Q.Boranbaev pen R. Nahanovtyń árqaisysyn 6 jylǵa bas bostandyǵynan aiyrýdy, al T.Januzaqty 5 jylǵa bas bostandyǵynan aiyrýdy surady.
"Apelliatsiialyq satydaǵy sot protsestik kelisimniń sharttarymen kelisti. Sot protsestik kelisimde kórsetilgennen artyq qatań jaza taǵaiyndaýǵa quqyly emes.
Sot úkimimen Q.Boranbaev pen R. Nahanov kináli dep tanylyp, árqaisysy 6 jylǵa bas bostandyǵynan aiyryldy. Olardyń 5 mlrd. teńgeden astam múlki tárkilendi.
T. Januzaqtyń atqarǵan rólin, sondai-aq jas balaǵa qamqorlyq jasap otyrǵanyn jáne densaýlyq jaǵdaiyn eskere kelip, sot ony 5 jyl merzimge bas bostandyǵynan aiyrdy" - delingen habarlamada.
Halyq Uni saitynyń jazýynsha, Boranbaev pen Nahanov ómir boiy memlekettik qyzmetti atqara almaidy. Sondai-aq sýdia bolý, jergilikti basqarý organdarynda, Ulttyq bankte jáne onyń quramyndaǵy vedomstvolarda, memlekettik jáne kvazimemlekettik mekemelerde qyzmet etý quqyǵynan aiyryldy. Odan bólek, Qazaqstan Prezidentine Qairat Boranbaevty «Qurmet», «Eren eńbegi úshin», «Parasat», III dárejeli «Barys» ordeninen aiyrý týraly usynys engiziledi.
"Sot úkimine sáikes, Boranbaevtyń menshigindegi Almaty qalasy ál-Farabi kóshesinde ornalasqan quny 686 mln teńge bolatyn kommertsiialyq nysan men jer ýchaskesi, «Qazaqstan Halyq banki» AQ shotyndaǵy 1 mlrd 270 mln 190 myń teńge jáne «Qazaqstan Halyq banki» AQ shotyndaǵy 5 685 727 dollar, 1 170 329 dollar, 775 859 601 teńge, 193 170 137 teńge memleket paidasyna tárkilenedi.
Roman Nahanovtan memleket paidasyna «Qazaqstan Halyq banki» AQ shotyndaǵy 1 mln dollar, Astanadaǵy úsh páteri óndirildi" - dep jazady aqparat agenttigi.
Bul rette Taiyr Januzaq ta ómir boiy memlekettik qyzmetti atqarý, sýdia bolý, jergilikti basqarý organdarynda, Ulttyq bankte jáne onyń quramyndaǵy vedomstvolarda, memlekettik jáne kvazimemlekettik mekemelerde qyzmet etý quqyǵynan aiyryldy.
