Foto: FK «Kairat»
30 qyrkúiekte Almatydaǵy Ortalyq stadionda ÝEFA Chempiondar ligasynyń toptyq kezeńi aiasynda «Qairat» pen Ispaniianyń áigili «Real Madrid» klýby arasynda tarihi kezdesý ótedi. Match qarsańynda «Qairat» fýtbol klýbynyń bas bapkeri Rafael Ýrazbahtin, sondai-aq oiynshylar Ádilet Sadybekov pen Aleksandr Shirobokov jýrnalisterge arnap brifing ótkizdi. Onda bapker komandanyń daiyndyǵy men aldaǵy oiyndaǵy taktikalyq josparlarymen bólisti, dep habarlaidy Ult.kz.
— Alǵashqy matchta sál qobaljý bolǵany ras. Biraq biz qazirdiń ózinde joǵary deńgeide 9 kezdesý ótkizdik. Sondyqtan oiynshylar asa qatty ýaiymdamaidy. Mundai atmosfera men emotsiialarǵa úirenip qaldyq. Bul – biz úshin qysym emes, kerisinshe motivatsiia, — dedi Ýrazbahtin.
Bapkerdiń aitýynsha, komanda buǵan deiin qoldanǵan taktikalyq shemadan aitarlyqtai aýytqymaidy.
— Mundai deńgeidegi qarsylasqa qarsy tek alǵa umtylý nemese kerisinshe túgel qorǵanysqa jabysyp alý – durys sheshim emes. Balansty ustaný mańyzdy. «Realdyń» quramynda sheberligi joǵary fýtbolshylar óte kóp. Biz qarsylas oiynshylarynyń qozǵalysyn shekteýge jáne ózimizge artyqshylyq beretin sátterdi tiimdi paidalanýǵa tyrysamyz. Biraq tek qorǵanyspen shektelmeimiz. Ár matchta shabýyl men qorǵanysty qatar alyp júrýge tyrysamyz, — dedi ol.
Sondai-aq, Rafael Ýrazbahtin «Real Madridtiń» Qazaqstanǵa kelýin el fýtboly úshin úlken jetistik dep baǵalady.
— Matchtyń Almatyda ótetini – úlken qýanysh. Jankúierler álemdik fýtbol juldyzdaryn alǵash ret tiridei kóredi. Biz bul kezdesýdi asyǵa kútip otyrmyz. Qandai nátije bolaryn boljaýǵa erte, biraq basty maqsatymyz – sapaly oiyn kórsetý, — dedi bas bapker.
Eske sala keteiik, buǵan deiin «Qairat» qaqpashylary Temirlan Anarbekov pen Zarýtskiidiń jaǵdaiy týraly aqparat taraǵan bolatyn.
