QR Syrtqy ister ministri Qairat Ábdirahmanov Eýropadaǵy qaýipsizdik jáne yntymaqtastyq uiymy Parlamenttik Assambleiasynyń tóraǵasy Georgii Tseretelimen jáne EQYU Parlamenttik Assambleiasynyń Ortalyq Aziia boiynsha arnaiy ókili Roman Haidermen kezdesti. Bul týraly QR SIM baspasóz qyzmeti habarlaidy.
Bedeldi parlamenttik birlestik basshylyǵy Ortalyq Aziia aimaǵyna jasaǵan týrne aiasynda Astanaǵa eki kúndik resmi saparmen keldi.
QR Syrtqy ister ministrliginde ótken kezdesý barysynda taraptar Qazaqstan men EQYU arasyndaǵy yntymaqtastyqtyń aǵymdaǵy jaǵdaiy men perspektivalaryn, halyqaralyq kún tártibi jáne parlamentaralyq dialogty odan ári nyǵaitý máselelerin talqylady.
Q. Ábdirahmanovtyń aitýynsha, parlamenttik diplomatiia memleketaralyq qatynastardyń tiimdi jáne senimdi quraly bolyp tabylady jáne jalpyǵa ortaq maqsattarǵa qol jetkizý úshin halyqaralyq arenadaǵy barlyq qatysýshylarmen tolyq kólemde paidalanylýy tiis. Qazaqstandyq diplomat EQYU Parlamenttik Assambleiasy basshylyǵynyń qyzmetin joǵary baǵalap, onyń qaýipsizdiktiń barlyq úsh ólsheminde Uiymnyń ózekti máselelerin sheshýge mańyzdy úles qosatynyn aitty. Sonymen qatar, elimizdiń Assambleiamen jáne EQYU qurylymdarymen osy baǵytta tiimdi yntymaqtastyqty jalǵastyrýǵa daiyn ekendigi atap ótildi.
G. Tsereteli Qazaqstan men EQYU Parlamenttik Assambleiasynyń ózara árekettestiginiń joǵary qarqynyn atap ótti. EQYU Parlamenttik Assambleiasy tóraǵasynyń aitýynsha, Qazaqstan Uiymnyń negizgi qundylyqtaryn qoldaityn, jaýapty jáne senimdi áriptes bolyp tabylady. Kezdesý barysynda Qazaqstannyń táýelsizdik jyldarynda qol jetkizgen áleýmettik-ekonomikalyq jáne syrtqy saiasi jetistikteri talqylandy. Qazaqstan Respýblikasynyń Prezidenti Nursultan Nazarbaevtyń basshylyǵymen júzege asyrylǵan elimizdiń tehnologiialyq transformatsiia úrdisi atap ótildi, onyń nátijesinde Qazaqstan álemniń damyǵan elderiniń qataryna qosylýda.
Halyqaralyq kún tártibiniń máselelerin talqylaý aiasynda Prezident Nursultan Nazarbaevtyń syrtqy saiasaty jáne onyń halyqaralyq bitimgershilik kúshteri joǵary baǵalandy. Sheteldik saiasatkerler men sarapshylar Memleket basshysynyń 2018 jylǵy 13 qarashada «Astana Club» qatysýshylarynyń kezdesýinde jariialanǵan jahandyq qaýipsizdik pen yntymaqtastyqty nyǵaitý jónindegi bastamalaryna qoldaý bildirdi. EQYU Parlamenttik Assambleiasy basshylyǵynyń aitýynsha, atalǵan bastamalar qaýipsizdiktiń álsireýi men senimsizdik jaǵdaiynda asa mańyzdy jáne oryndy bolyp tabylady.
Sondai-aq, taraptar halyqaralyq yntymaqtastyqty odan ári keńeitý jáne zamanaýi qaýip-qaterlerge, onyń ishinde halyqaralyq lańkestik, dini ekstremizm, zańsyz kóshi-qon, esirtkiniń zańsyz ainalymy, transulttyq uiymdasqan qylmys jáne basqa da qaterlerge qarsy kúreste halyq qalaýlylaryn tartý qajettigi týraly kelisti.
Kezdesý sońynda taraptar ózara múddeli máseleler boiynsha syndarly dialogty jalǵastyrý sondai-aq tyǵyz jumys bailanystaryn, Qazaqstan Respýblikasynyń EQYU-ǵa tóraǵalyǵy kezinde bastaý alǵan dástúrlerdi saqtaý jáne uiymnyń 21-ǵasyrdaǵy jalǵyz sammitin aldaǵy ýaqytta jalǵastyrý týraly ýaǵdalasty.
EQYU Parlamenttik Assambleiasy delegatsiiasynyń Qazaqstanǵa sapary aiasynda Senat Tóraǵasy Qasym-Jomart Toqaev pen Májilis Tóraǵasy Nurlan Nyǵmatýlinmen kezdesýler ótkizildi. Joǵarǵy Sot Tóraǵasy Jaqyp Asanovpen, Bas prokýratýra men Ishki ister ministrliginiń basshylyǵymen kezdesýler josparlanǵan.
Parlamenttik delegatsiia Qazaqstandaǵy sapary aiaqtalǵannan keiin Ózbekstanǵa barady.
