Qazaqstanda koronavirýstyń taralýyna jol bermeý jónindegi vedomstvoaralyq komissiia el mektepterinde karantin talaptarynyń saqtalýyna júrgizilip jatqan monitoring nátijelerin aitty, dep habarlaidy "Ult aqparat"
«Oqý jylynyń III toqsanynda 11 qańtar men 1 sáýir aralyǵynda 5 213 tekseris júrgizildi. Nátijesinde 575 mektepte karantin talaptaryn buzýshylyq anyqtaldy. Bul, elimiz boiynsha 11,0% quraidy», - delingen aqparatta.
Karantin rejiminiń talabyn buzatyn mektepterde kelesi faktiler anyqtaldy:
- kóp jaǵdaida tańerteńgilik tekserý– oqýshylardy irikteý júrgizilmegen;
- oqý oryndarynyń qyzmetkerleri maska rejimin saqtamaǵan;
- birqatar mektepte araqashyqtyq belgileri qoiylmaǵan;
- bólmelerge ylǵaldy tazalaý jáne zalalsyzdandyrý júrgizý kestesi buzylǵan;
- synyptarda partalar arasyndaǵy qashyqtyq saqtalmaǵan;
- bakteritsidtik shamdar, sanitaizerler men zalalsyzdandyrý quraldary jetkiliksiz;
- paidalanylǵan maskalarǵa arnalǵan qoqys ýrnalary jetkiliksiz.
Osy jyldyń 16-22 sáýiri aralyǵynda monitoringilik toptar mektepterge 439 tekserý júrgizgen. Karantin talaptaryn buzýshylyq 80 mektepte anyqtaldy, iaǵni 18,2% karantin rejimi tártibin buza otyryp jumys jasaǵan.
Mekteptegi karantin talabyn jii buzǵan óńirler:
- Qaraǵandy oblysy – 26 buzýshylyq;
- Túrkistan oblysy – 15;
- Qyzylorda oblysy – 12;
- Shymkent qalasy– 9;
- ShQO – 8.
«Anyqtalǵan barlyq karantindik, sanitariialyq-gigienalyq talaptardy buzýshylyqtar boiynsha QR ÁQBtK-niń 425-babyna sáikes 99 tulǵaǵa jalpy kólemi 17 784 764 teńge ákimshilik aiyppul salyndy», - delingen vedomstvoaralyq komissiia aqparatynda.
